اقتوبەدە وقۋشىلاردى وليمپياداعا اپارعان مۇعالىم سوتتالۋى مۇمكىن

اقتوبە. KAZINFORM - اقتوبەدە وليمپياداعا قاتىسپاق بولعان وقۋشىلاردى تاسىمالداعان مۇعالىم ەندى 5 جىلعا باس بوستاندىعىنان ايىرىلۋى مۇمكىن. بۇگىن سوتتا جارىس ءسوز ءوتتى.

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا سامارا-شىمكەنت تاسجولىنداعى جول-كولىك وقيعاسىنا قاتىستى ءىستىڭ جارىس ءسوزى ءوتتى. وندا مەملەكەتتىك ايىپتاۋشى ءىستىڭ ءمان-جايىن ءتۇسىندىردى.

«بۇل ءىس قىلمىستىق كودەكستىڭ 11-بابىنا سايكەس ورتاشا اۋىرلىقتا جانە ابايسىزدا جاسالعان قىلمىس ساناتىنا جاتادى. قىلمىستىق كودەكستىڭ 54-بابىنا سايكەس قىلمىستىق جازانى اۋىرلاتاتىن ءمان-جاي سوت بارىسىندا جانە تەرگەپ-تەكسەرۋ كەزىندە انىقتالماعان. قىلمىستىق كودەكستىڭ 53-بابىنا سايكەس ونىڭ بۇرىن سوتتى بولماعانى، كىناسىن تولىق مويىنداۋى، شىن نيەتپەن وكىنۋىن، جابىرلەنۋشىلەرمەن تاتۋلاسۋىن، ولاردىڭ كەشىرىم بەرۋىن جانە ماتەريالدىق-مورالدىق تالاپ قويماۋىن جازانى جەڭىلدەتەتىن ءمان-جاي دەپ ەسكەرۋدى سۇرايمىز. جازا تاعايىنداۋ بارىسىندا ونىڭ جاعىمدى مىنەزدەمەلەرىن ەسكەرۋدى سۇرايمىز. جاعىمسىز مىنەزدەمەلەر تىركەلمەگەن. سوتتالۋشى قىلمىستىق كودەكستىڭ 345-بابى 4-بولىگىمەن كىنالى دەپ تانىلىپ، ونى 7 جىلعا كولىك قۇرالىن باسقارۋ قۇقىعىنان ايىرا وتىرىپ، 5 جىل باس بوستاندىعىنان ايىرۋ جازاسىن تاعايىنداۋدى سۇرايمىز. جازاسىن وتەۋ ورنى قىلمىستىق اتقارۋ جۇيەسىنىڭ قاۋىپسىزدىگى بارىنشا تومەن مەكەمەسى دەپ بەلگىلەۋدى سۇرايمىز»، - دەدى مەملەكەتتىك ايىپتاۋشى.

ەسكە سالساق، جول-كولىك وقيعاسى بىلتىر جەلتوقسان ايىندا بولدى. وندا ەكى وقۋشى مەن ءبىر مۇعالىم كوز جۇمدى. رۋلدە سول مەكتەپتىڭ مۇعالىمى بولعان. سوت وتىرىسى باستالعان كەزدە جول-كولىك وقيعاسىنىڭ سالدارىنان ءبىر وقۋشىنىڭ باسى جۇلىنىپ قالعانى دا بەلگىلى بولدى.