اقتوبەدە تارىدان ونداعان تاعام جاسالدى
اقتوبە. KAZINFORM - اقتوبەدە تارىدان جاسالعان ۇلتتىق تاعامدار قايتا جاڭعىردى. بۇگىن ونداعان تاعام دايىندالىپ، ۇسىنىلدى.
اقتوبە قالاسىنىڭ 156 جىلدىعىنا وراي قالادا ەتنوفەستيۆال ءوتتى. وندا ءجۇن ءتۇتۋ، ءجۇن ساباۋ، ۇرشىق ءيىرۋ سەكىلدى ۇلتتىق سالت- ءداستۇر جاڭارىپ، كيمەشەك كيگەن اجەلەر شەبەرلىك ساباعىن وتكىزدى. سونىمەن بىرگە ۇلتتىق تاعامدى قايتا جاڭعىرتقان كاسىپكەرلەر ۇلتتىق تاعامدى دايىنداۋ جولىن ۇسىندى.
- سارى مايدىڭ سۋى مەن شۇبات قوسىپ، تارى ارالاستىرامىز. بۇل تاعامدى تاڭەرتەڭ اش قارىنعا جەيدى. ال حالۆا تارى جارماسى مەن ىرىمشىكتەن، سارى مايدان جاسالادى، - دەدى انارگۇل قاۋجىموۆا.
جاس كاسىپكەر قازىر قالادا وتىرىپ، ءسۇت جانە ءسۇت ونىمدەرىن، ۇلتتىق تاعامدار دايىندايدى. ءتىپتى تارىدان جاسالعان نان پىسىرەدى. ول ءۇشىن شيكى تارىنى پايدالانادى. قازىر ءوزى تارىدان 10 نان استام ءونىم الىپ وتىر، سۇرانىس تا جوعارى.
ال اقتوبە وبلىسى ويىل اۋدانى 14 ءتۇرلى تاعام ازىرلەدى. اۋداندا ەنە مەن كەلىن كلۋبى بار. قاريالار كەلىندەرىنە جاسالۋ جولىن ۇيرەتەدى.
- قازاقتىڭ ۇلتتىق تاعامىن ارنايى ساتامىز دەپ ايتا المايمىن. بۇل ءار قازاقتىڭ داستارحانىندا بار ونىمدەر. ماسەلەن قۇرت قوسىلعان جەنت. قايناتىلعان قۇرتقا تارىنىڭ تالقانىن قوسامىز. سونىمەن بىرگە مەيىز، قانت قوسىپ، جانشىپ، قولدىڭ سارى مايىنا ارالاستىرامىز. ال ايران كوجە ءشولدى قاندىرادى. «بيداي كوجە ءتۇن قاتقانشا، ايران كوجە تاڭ اتقانشا» دەگەن ءسوز بار. تارىنى جۋىپ، قايناتىپ، سۋىرىپ، تۇزىن سالادى. سوڭىندا ايران قۇيادى. اشىعان ءسۇت كوجەنى دايىنداۋ جولى وڭاي. تارىنى جۋىپ، ەكى ليتر سۇتكە قايناتادى. قايناعان سوڭ تۇز، قانت سالادى. سوڭىندا 4-5 قاسىق اشىعان ايران قۇيىپ جىبەرەدى. قازىمايسوك دەگەن وتە ءدامدى تاعام بار. قازىنى ارنايى قايناتىپ الىپ، سورپا بەتىنە شىققان مايىن قالقىپ، تارى بوكتىرەدى. ال مايسوك ەتتى قايناتىپ، سونىڭ مايىنا تارىنى بوكتىرەدى. ويىلدىڭ برەندى - تارى. اق تارىنىڭ اتاسى شىعاناق بەرسيەۆتىڭ اۋىلى دەپ تارى ءونىمىن ءجيى ۇسىنامىز، - دەدى «ايەل باقىتى» جاس كەلىندەر كلۋبىنىڭ مۇشەسى گۇلنارا بيسەكەنوۆا.
ال مادەنيەت سالاسىنىڭ ارداگەرى بالقيا رىسبايەۆا تارىدان 50 ءتۇرلى تاعام دايىنداي الادى. تارىنىڭ ادام دەنساۋلىعىنا پايداسى مەن بالالارعا ۇسىنۋ ءادىسىن ايتىپ بەردى.
- قاۋىنعا، اسقاباققا دا قوسىپ بەرۋگە بولادى. ءسۇت كوجە، ايران كوجەنىڭ ءدامىن تارى قوسىپ كەلتىرەمىز. ءدامدى قۇرتقا قانت، تارى سالىپ قويسا بوگىپ تۇرادى. قايماققا قانت، تارىنىڭ جارماسىن سالىپ، ءبىر كەسەسىن جەپ السا توق جۇرەدى. ەر بالالارعا تارى بوكتىرىپ بەرگەن بۇرىن. بۇل ءارى تاعام، ءارى سۋسىن، ءارى كۇش- قۋات بەرەدى. دارۋمەنگە تولى تاعام عوي. دۇكەندەگى ءتۇرلى زياندى تاعامنىڭ ورنىنا ءبىر قاسىق تارى جەگىزۋ كەرەك. بالانىڭ اۋىز قۋىسىنداعى بۇلشىق ەتى داميدى، ءتىسى وتكىر، تازا بولادى. ماقسات - تارىنى بولاشاققا تانىتۋ، ناسيحاتتاۋ، - دەدى زەينەتكەر.
اقتوبەدە تارى قۋىرىپ، ساتۋ شاعىن كاسىپتىڭ ءتۇرى. سونىمەن بىرگە وڭىردە ءتۇرلى فەستيۆال وتكىزىلىپ تۇرادى.
- قازىر زامان قايتا وزگەرىپ، ادامدار ۇلتتىق تاعامدى ساتىپ الادى. ۇلتتىق تاعامنىڭ باعاسى ارتتى. ءوزىم تارى كەلدەگىنە بارامىن، ونى باسىپ، تازارتىپ الامىن. كەيىن قۋىرىپ، ساتامىن، - دەدى اقزەر قايىرجانوۆا.
بۇعان دەيىن ۇلتتىق تاعام ناۋرىز كوجەنىڭ جاسالۋ جولى تۋرالى جازىلدى.
