اقتوبەدە ەسەپشى مۇعالىمدەرگە 51 ميلليون تەڭگەدەن استام قارجىنى ارتىعىمەن اۋدارىپ جىبەرگەن
اقتوبە. KAZINFORM - بۇزۋشىلىقتى وبلىستىق مەملەكەتتىك ىشكى اۋديت دەپارتامەنتى انىقتادى.
شالقار اۋدانىنداعى 5-مەكتەپ ليتسەيىندە اۋديتورلىق تەكسەرۋ جۇرگىزىلدى. ناتيجەسىندە 51400000 تەڭگە بولاتىن بۇزۋشىلىق دەرەگى انىقتالدى.
- مەكتەپ ەسەپشىسى مۇعالىمدەرگە ەڭبەكاقىنى ارتىعىمەن تولەگەن. بىلتىر 19 ميلليون تەڭگە، ال بيىل 32400000 تەڭگەنىڭ بۇزۋشىلىقتارى انىقتالدى. مۇعالىمدەر اقشانى بىلتىر تۇگەل قايتاردى. بيىل دا قايتارعانىن ايتىپ، تۇبىرتەك تاپسىردى. الايدا بيۋجەتكە ءتۇسىپ، تۇسپەگەنىن ناقتىلايمىز. بيىل «ونلاين بيۋجەتتىك مونيتورينگ» قوسىمشاسى ىسكە قوسىلىپ، قازىر سول ارقىلى تەكسەرۋ جۇرگىزىلەدى. بۇل مەملەكەتتىك، بيۋجەتتىك مەكەمەلەرگە بارماي-اق قاشىقتان باقىلاۋعا مۇمكىندىك بەرەدى، - دەدى اقتوبە وبلىستىق مەملەكەتتىك ىشكى اۋديت دەپارتامەنتىنىڭ باسشىسى ساكەن قاسىموۆ.
سونىمەن بىرگە ىشكى اۋديتكە جوعارعى سپورت شەبەرلىگى مەكتەبىنەن شاعىم ءتۇستى. وندا باپكەرلەر ءىس ساپارعا بارماي-اق جالاقىمەن قاتار قوسىمشا اقشا العانى انىقتالدى. شىعىن - 3,4 ميلليون تەڭگە. تەكسەرۋ كەزىندە اقتوبە وبلىستىق مەملەكەتتىك ىشكى اۋديت دەپارتامەنتى شىمكەنت قالاسىنا سۇرانىس جىبەرىپ، اقتوبەلىك قۇرامانىڭ وقۋ-جاتتىعۋعا مۇلدە قاتىسپاعانىن ءبىلدى.
ايتا كەتەيىك، بيىل ءبىرىنشى جارتىجىلدىقتا 76 اۋديتورلىق تەكسەرۋ جۇرگىزىلدى. بارلىعى 75 لاۋازىمدى تۇلعاعا قاتىستى 150 اكىمشىلىك ءىس قوزعالىپ، 12 ميلليون تەڭگە ايىپپۇل سالىندى. ال 99 لاۋازىمدى تۇلعا تارتىپتىك جازاعا تارتىلدى.
ەسكە سالساق، شالقار اۋداندىق ساۋلەت، قۇرىلىس جانە قالا قۇرىلىسى ءبولىمىنىڭ باسشىسى ەكى مەردىگەردەن ميلليونداپ پارا العانى ءۇشىن ايىپتالىپ جاتىر. ءبىرى سۋ جەلىلەرىن قايتا جاڭعىرتۋ، ەكىنشىسى تۇرعىن ۇيگە ينجەنەرلىك ينفراقۇرىلىم تارتۋ جوبالارىنىڭ مەردىگەرى.
