اقتوبەدە كورىسۋ كۇنى 100 اجە مەن 100 كەلىن كەرۋەن قۇردى
اقتوبە. KAZINFORM - قالاداعى «گەولوگ» مادەنيەت ءۇيى 100 اجە مەن 100 كەلىن كەرۋەنىن ۇيىمداستىرىپ، كورىسۋ كۇنىن اتاپ ءوتتى.
اقتوبە قالاسى ەسەت باتىر تۇرعىن الابىندا بۇگىن ەنە مەن كەلىن كەرۋەنى ءوتتى. وعان كيمەشەك كيگەن اجەلەر مەن ورامال تارتقان كەلىندەر قاتىستى.
- بىلتىر كيمەشەك كيگەن 100 اجە كەرۋەنى ءوتتى. بيىل 100 ەنەگە 100 كەلىن قوسىلدى. كەلەر جىلى تاعى 100 نەمەرە ەرتىپ، كەرۋەنگە شىعادى دەپ جوسپارلاپ وتىرمىز. ناۋرىزناما تۇجىرىمداماسىنىڭ ءبىرىنشى كۇنى، ياعني، كورىسۋ كۇنى وسىلايشا قايتا جاڭعىرىپ جاتىر. «گەولوگ» مادەنيەت ءۇيىنىڭ «شولپى» كلۋبى ۇيىمداستىرعان شارا حالىقتىق سيپات الىپ كەلەدى. ۇلتتىق كيىمدى ءبىر كۇن ەمەس، كۇندەلىكتى جۇمىسقا كيىپ جۇرۋگە بولادى. اجەلەرىمىزدىڭ اراسىندا 90 جاستان اسقاندارى مەن 65 جاستاعى قاريالار بار. ال كەلىندەردىڭ اراسىندا جاسى دا، بوساعانى 10 -جىل بۇرىن اتتاعانى دا بار، - دەدى «داستۇرگە جول» انالار كەڭەسىنىڭ مۇشەسى بيبىگۇل ابدىشۇكىر قىزى.
قولىنا قىران قوردىرعان باتىرلار مەن تازى ەرتكەن ەر ازاماتتار دا كەرۋەندە بولدى. بۇل شاراعا مادەنيەت ءۇيى ەكى اپتا بۇرىن دايىندالعان.
- اقتوبە قالاسى الماتى اۋدانى ەسەت باتىر تۇرعىن الابىندا مەكتەپ، بالاباقشا، ءتۇرلى مەكەمەلەر بار. ولاردىڭ بارىنە ەكى اپتا بۇرىن حابار بەرىپ، كەرۋەنگە اتسالىسۋدى سۇرادىق. سونىمەن بىرگە «گەولوگ» مادەنيەت ءۇيىنىڭ اجەلەر ءانسامبلى قوسىلدى. 100 اجە مەن 100 كەلىن كەرۋەنى ءجۇرىپ وتكەن سوڭ تۇرعىندار كونتسەرت تاماشالادى. اۋىلدىڭ ادەمى كورىنىسى وسى، - دەدى «گەولوگ» مادەنيەت ءۇيىنىڭ ديرەكتورى ارمان جيەناليەۆ.
اقتوبەلىك ولكەتانۋشى بەكارىستان مىرزابايەۆ بۇل كۇننىڭ تانىمدىق ءرولى باسىم بولۋ كەرەك دەپ سانايدى.
- قازىر تانىمىمىزدى كەڭەيتۋ كەرەك دەپ ايتامىز. 10 كۇن بويى تويلاي بەرمەي، استرونوميالىق نەگىزى بار ەكەنىن دە ايتۋ كەرەك. ومار حايام جىلدىڭ ۇزاقتىعىن 264 كۇن 5 ساعات 17 مينۋت 46 سەكۋند دەپ بىلگىلەيدى. ءال-بيرۋنيمەن ەكەۋى وسىنداي ناقتى دالدىكپەن ەسەپتەگەن. اقپان 28 كۇننەن اياقتالادى، ءتورت جىلدا ءبىر رەت كىبىسە جىلى كەلەدى. ءبىر كۇن قايدان پايدا بولدى؟ ول ءبىر جىلدا جينالعان 5 ساعات 17 مينۋت 46 سەكۋندتان پايدا بولدى. ءتورت جىلدا 21 ساعات 12 مينۋت بولادى. بۇل 24 ساعاتقا جەتپەدى. جينالىپ-جينالىپ، 13 كۇن ايىرماشىلىق شىقتى. 14 نەن باستاپ ناۋرىز كەلدى دەپ كورىسەتىن سەبەبىمىز سول. كورىسۋ كۇن مەن ءتۇن تەڭەلگەن كەزدە بولۋ كەرەك دەپ ەسەپتەيمىن. مەنىڭ ەستىگەنىم بويىنشا ەر اداممەن ەر ادام، ايەلمەن ايەل قۇشاقتاسىپ كورىسەدى. ال ەر مەن ايەل قول الىسىپ كورىسەدى. تەك ناۋرىزدا، امال كۇنىندە ەمەس، كوپتەن كورىسپەگەندەر سولاي كورىسەدى. وسىنداي ءداستۇرىمىزدى جاڭعىرتقان دۇرىس دەپ ويلايمىن. كورىسكەن، ءبىر-ءبىرىن ارالاعىن دۇرىس. اقتوبەنىڭ بايعانين، ويىل، تەمىر، قوبدا اۋداندارىندا ساقتالعان، - دەدى ولكەتانۋشى.
بۇگىن اقتوبەنىڭ بارلىق اۋدان، اۋىلىندا كورىسۋ كۇنى ءوتىپ جاتىر. ال كەشكە «كوكتەم باسى - كورىسۋ كۇنى» اتتى مادەني-كوپشىلىك شاراسى وتەدى.
ايتا كەتەيىك، ماڭعىستاۋداعى وتپان تاۋدا «بىرلىك وتى» جاعىلدى.
