اقتوبەدە كولىك ۇرلاپ، پوليتسيادان قاشقان كۇدىكتى جول اپاتىنا ءتۇستى

اقتوبە. KAZINFORM - اقتوبەدە كولىكتى ايداپ كەتكەن كۇدىكتىلەر پوليتسيانى كورىپ، قاشا جونەلەدى. جول ەرەجەسىن بۇزعان جۇرگىزۋشى وزگە كولىككە سوقتىعىسىپ، ءورت شىقتى. سالدارىنان ەكى ادام اۋرۋحاناعا ءتۇستى.

وقيعا كەشە اقتوبە قالاسىنداعى كەڭەس نوكين داڭعىلىندا بولدى. وبلىستىق پد باسپا ءسوز قىزمەتىنىڭ حابارلاۋىنشا، ساۋدا ءۇيىنىڭ ءبىرىنىڭ اۆتوتۇراعىنان Daewoo Nexia اۆتوكولىگى ۇرلاندى. كەيىن پاترۋلدىك پوليتسيا ۇرلانعان كولىكتى بايقاپ، توقتاۋىن تالاپ ەتكەن. الايدا جۇرگىزۋشى باعىنباي، جىلدامدىقتى اسىرىپ، قاشا جونەلەدى.

- ىزگە ءتۇسۋ كەزىندە كۇدىكتىلەر كەڭەس نوكين داڭعىلىندا قارسى جولاققا شىعىپ، ۆاز اۆتوكولىگىمەن بەتپە-بەت سوقتىعىسقان. اپات سالدارىنان ەكى اۆتوكولىكتەن دە ءورت شىققان. جول-كولىك وقيعاسىنان ۆاز اۆتوكولىگىنىڭ جۇرگىزۋشىسى مەن جولاۋشىسى اۋرۋحاناعا جاتقىزىلدى. ەكى كۇدىكتى ۇستالىپ، پوليتسيا بولىمىنە جەتكىزىلدى. كولىكتى زاڭسىز ايداپ اكەتۋ فاكتىسى بويىنشا سوتقا دەيىنگى تەرگەپ-تەكسەرۋ باستالدى، - دەپ حابارلادى وبلىستىق پ د باسپا ءسوز قىزمەتى.

ايتا كەتەيىك، اقتوبەدە تەك رەتسەپتپەن ساتىلاتىن ءدارى مەن پسيحوتروپتى زاتتاردى زاڭسىز ساتقان ەكى كۇدىكتى ۇستالدى. ولاردان اقشا مەن ءدارى-دارمەك تاركىلەندى.

اۆتور

التىناي ساعىندىقوۆا