اقتوبەدە جول ەرەجەسىن 308 رەت بۇزعان جۇرگىزۋشىگە 11 ميلليون تەڭگە ايىپپۇل سالىندى
اقتوبە. KAZINFORM - اقتوبەلىك تۇرعىن ەكى اي ىشىندە 308 رەت جول ەرەجەسىن بۇزدى. ول شەتەلدىك ءنومىرلى كولىكپەن ءجۇرىپ، جىلدامدىقتى اسىرعان. ءسويتىپ 11,5 ميلليون تەڭگە ايىپپۇل ارقالادى.
اقتوبەدە «قاۋىپسىز جول» جەدەل-الدىن الۋ ءىس-شاراسى ءوتتى. پوليتسيا قىزمەتكەرلەرى ەكى ايدىڭ ىشىندە جول ەرەجەسىن 308 رەت بۇزعان، جىلدامدىقتى اسىرعان جاس جىگىتتى ۇستادى. شەتەلدىك ءنومىرى بار ۆاز-2114 اۆتوكولىگىن باسقارعان 35 جاستاعى قالا تۇرعىنىنىڭ ارەكەتى «قورعاۋ» جۇيەسى ارقىلى انىقتالدى. پاترۋلدىك پوليتسيا باتالونىنىڭ قىزمەتكەرلەرى جۇرگىزۋشىنى ۇستاپ، كولىك تۇراققا قويىلدى. ايىپپۇلداردىڭ جالپى سوماسى 11 ميلليون 573 مىڭ تەڭگەنى قۇرادى.
- جۇرگىزۋشىلەر وزدەرىنىڭ جانە اينالاسىنداعىلاردىڭ قاۋىپسىزدىگى تۋرالى ويلانۋى كەرەك. شەتەلدىك ءنومىرى بار كەيبىر كولىك جۇرگىزۋشىلەرى جازادان قۇتىلىپ كەتەمىن دەپ ۇمىتتەنەدى. ءبىراق ولاي ەمەس. ءبىز مۇنداي زاڭ بۇزۋشىلاردى انىقتاپ، ولاردى جاۋاپقا تارتامىز، - دەپ اتاپ ءوتتى اقتوبە قالاسى پوليتسيا باسقارماسىنىڭ باستىعى اسەت قاليەۆ.
ايتا كەتەيىك، اقتوبە وبلىسىندا قار جاۋعاندا جولدا جول-كولىك اپاتى كوبەيدى. ءبىر تاۋلىكتە 30 كولىك سوقتىعىسىپ، 4 ەۋى اۋدارىلدى.
