اقتوبەدە جاڭا جىل مەرەكەسىنە وراي قالانى بەزەندىرۋگە قارجى بولىنبەيدى

اقتوبە. KAZINFORM - اقتوبە قالاسىندا جاڭا جىل مەرەكەسىنە وراي بەزەندىرۋ جۇمىسى تاۋەلسىزدىك كۇنىنەن كەيىن عانا باستالادى. ورتالىق الاڭداعى شىرشانى قۇرۋ، بەزەندىرۋگە بيىل دا قارجى بولىنبەيدى.

اقتوبە قالاسىندا سوڭعى جىلدارى جاڭا جىلدىق بەزەندىرۋگە بيۋدجەتتەن قارجى بولىنبەي كەلەدى. بيىل دا بۇعان دەيىنگى شىرشالار مەن اشەكەيلەردى پايدالانادى.

- قالانىڭ باستى شىرشاسى ق ر تۇڭعىش پرەزيدەنتى اتىنداعى ورتالىق مادەنيەت جانە دەمالىس ساياباعىندا ورناتىلادى. ودان باسقا ەكى اۋداننىڭ اۋماعىندا قويىلادى. ولار: ەسەت باتىر تۇرعىن الابىنداعى سۋپەرماركەت الدى، التىن وردا تۇرعىن الابىنداعى جەكپە-جەك سارايى مەن قالالىق اكىمدىك الدىنداعى ايتەكە بي ەسكەرتكىشىنىڭ جانى. قالانى بەزەندىرۋ 16-جەلتوقساننان كەيىن باستالادى. بۇدان بولەك قالانىڭ كاسىپكەرلەرى ءوز ەسەبىنەن عيماراتتارى ورنالاسقان اۋماقتارىن جاڭا جىلعا وراي بەزەندىرەدى. قالالىق تۇرعىن ءۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمى 2018 -جىلدان بەرى شىرشا ساتىپ الۋعا، بەزەندىرۋگە قارجى بولمەدى. سول كەزدە قانشا بولىنگەنىن قازىر ايتا المايمىز. بۇل 6 جىل ءوتىپ كەتكەن مەملەكەتتىك ساتىپ الۋ ءراسىمى ءارى قۇجاتتار مۇراعاتقا جىبەرىلگەن، - دەدى اقتوبە قالاسى اكىمىنىڭ باسپا ءسوز حاتشىسى ايگۇل بايمەنوۆا.

اقتوبە قالاسى بويىنشا 25-31-جەلتوقسان ارالىعىندا مەرەكەلىك ءىس-شارالار ۇيىمداستىرىلادى.

- باس شىرشانى جاعۋ ءراسىمى، بالالارعا ارنالعان «عاجايىپقا تولى جاڭا جىل» جانە ەستۋ قابىلەتى شەكتەۋلى بالالارعا ارنالعان «قوش كەلدىڭ، جاڭا جىلى!»، ونىڭ ىشىندە از قامتىلعان وتباسىلاردان شىققان بالالارعا «جاڭا جىل كەلدى» اتتى شارا وتەدى، - دەدى ايگۇل بايمەنوۆا.

ايتا كەتەيىك، جاڭا جىل مەرەكەسىنە وراي استانا، الماتى جانە شىمكەنت قالالارى اراسىندا قوسىمشا تالگو پويىزدارى قاتىنايدى.

اۆتور
التىناي ساعىندىقوۆا