اقتوبەدە الاياققا سەنگەن تۇرعىن 19 ميلليون تەڭگەسىنەن ايىرىلدى
استانا. KAZINFORM - الاياققا سەنگەن اقتوبە تۇرعىنى 19 ميلليون تەڭگەسىنەن ايىرىلىپ قالدى. Polisia.kz سايتىنىڭ مالىمەتىنشە، شىلدە ايىندا اقتوبە قالاسىنداعى مەكەمەلەردىڭ ءبىرىنىڭ باسشىسى تەلەفون-الاياقتارىنىڭ ارباۋىنا ءتۇسىپ، 19 ميلليون تەڭگەگە قارىزعا كىرگەن.
اقتوبەلىك ايەلدىڭ تەلەفونىنا بەلگىسىز ادامدار WhatsApp مەسسەندجەرى ارقىلى حابارلاسىپ، وزدەرىن ۇلتتىق قاۋىپسىزدىك كوميتەتىنىڭ، ۇلتتىق بانكتىڭ جانە پوليتسيا دەپارتامەنتىنىڭ قىزمەتكەرلەرى رەتىندە تانىستىرعان. قوڭىراۋ شالۋشىلار جابىرلەنۋشىگە ونىڭ اتىنا الاياقتار ءتۇرلى بانكتەردەن 10 ونلاين-نەسيە راسىمدەلگەنىن جانە ولاردىڭ كۇشىن جويۋ ءۇشىن ءوز اتىنا بىرنەشە نەسيە راسىمدەۋ قاجەتتىگىن ايتقان.
ايەل قوڭىراۋ شالۋشىلاردىڭ بارلىق شارتىن ورىنداپ، قالاداعى 3 بانكتەن ءوز اتىنا 14 ميلليون تەڭگەگە جۋىق سوماعا نەسيە راسىمدەگەن. سونىمەن قاتار جاقىن تۋىستارىنان 5 جارىم ميلليون تەڭگە قارىز العان. ءارى قاراي جالپى سوماسى 19 ميلليون تەڭگەدەن اساتىن اقشانى الاياقتار كورسەتكەن بانكتىك شوتتارعا اۋدارعان. ەكى كۇننەن كەيىن عانا الاياقتارعا الدانىپ، قارىزعا باتقانىن تۇسىنگەن جابىرلەنۋشى پوليتسياعا ارىزداندى.
- قۇزىرلى مەكەمە قىزمەتكەرلەرى WhatsApp مەسسەندجەرى ارقىلى قوڭىراۋ شالمايتىنىن، جەكە دەرەكتەرىڭىزدى جانە تەلەفونعا ەشقانداي قوسىمشا باعدارلامالار جۇكتەۋدى سۇرامايتىنىن جانە ءوز اتتارىڭىزعا نەسيە راسىمدەپ، اۋدارىپ جىبەرۋدى تالاپ ەتپەيتىنىن ازاماتتاردىڭ تاعى دا ەسىنە سالامىز، - دەدى اقتوبە وبلىسى پ د كيبەرپول ءبولىمىنىڭ باسشىسى گالينا ستىرليچۋك.
ەسكە سالا كەتەيىك، بۇعان دەيىن ەكى اپتا ىشىندە ءى ءى م جەدەل بولىنىستەرى ىزدەۋدە جۇرگەن 117 قىلمىسكەردى ۇستاپ، حابار-وشارسىز كەتكەن 98 ادامنىڭ ورنالاسقان جەرىن انىقتاعانىن جازعان ەدىك.
اۆتور
ابىلايحان جۇماشەۆ
