اقتوبە وبلىسىندا قۇرعاق ءشوپ ورتەنىپ، كەيبىر اۋىلدارعا قاۋىپ ءتوندى

اقتوبە. KAZINFORM - بايعانين اۋدانىنىڭ ديار اۋىلىنان 70 شاقىرىم قاشىقتىقتا قۇرعاق ءشوپ ورتەندى. ءورت ءسوندىرۋ جۇمىسى 2-ماۋسىم كۇنى تۇندە باستالىپ، بۇگىن اياقتالدى.

اقتوبە وبلىستىق ت ج د باسپا ءسوز قىزمەتىنىڭ حابارلاۋىنشا، ءورت ميالى اۋىلدىق وكرۋگى ديار اۋىلىنان 70 شاقىرىم قاشىقتىقتا تۇتانعان. وتقا ورانعان قۇرعاق ءشوپتى سوندىرۋگە ءورت سوندىرۋشىلەر جانە جەرگىلىكتى اتقارۋشى ورگان قىزمەتكەرلەرى بارعان. سايلانعانىنا ەكى-اق كۇن بولعان ميالى اۋىلدىق وكرۋگىنىڭ اكىمى يساتاي مانىبايەۆتىڭ ايتۋىنشا، ءورت 2-ماۋسىم كۇنى تۇندە تىركەلگەن.

- ەدىرەي جەرىنەن جانىپ كەلگەن ءورت 2-ماۋسىم كۇنى تۇندە باستالدى. قالاي ورتەنگەنىن ەشكىم دە بىلمەيدى. ديار اۋىلىنا جاقىنداعان جەردەن تۇرعىندار، قوجالىق جۇمىسشىلارى، ورتكە قارسى بەكەت قىزمەتكەرلەرى شىعىپ، ءسوندىردى. اۋىلعا جەتكىزبەدى. قالعان ءورت جەل اۋعان كەزدە جاڭاجول اۋىلدىق وكرۋگىنە اۋىسىپ كەتتى. سوندىقتان ءبىز، جاڭاجول اۋىلدىق وكرۋگى اكىمدىگىنىڭ قىزمەتكەرلەرى كەشەدەن بەرى سوندا ءجۇرىپ، جاڭا كەلىپ جاتىرمىز. ءالى دە ءار جەرىندە جانىپ جاتقان جەرلەر بار. ول جەرلەردى ادامدار باقىلاپ، ءسوندىرىپ ءجۇر. مالعا، جانعا قاۋىپ جوق. ءورت اۋىلدان 70 شاقىرىم قاشىقتىقتا تىركەلدى، - دەدى ميالى اۋىلدىق وكرۋگىنىڭ اكىمى يساتاي مانىبايەۆ.

ونىڭ ايتۋىنشا، بيىل ءشوپ قالىڭ شىققانىمەن قۋراعان.

- ديار اۋىلىنان ءۇش تراكتور، 1 ۋرال كولىگى باردى. سونىمەن بىرگە ويماۋىتتان جەر جىرتاتىن ماشينا جانە بىرنەشە ۋاز كولىگى باردى. ءبارىمىز جابىلىپ ءسوندىرىپ جاتىرمىز. ادامدار ارتىن قاراپ تۇر. تۇتانىپ كەتۋى مۇمكىن، - دەدى يساتاي مانىبايەۆ.