اقتوبە وبلىسى: «ماگادجان» بوگەتىن كۇتىپ ۇستاماعان كاسىپكەر تەرگەلىپ جاتىر

استانا. KAZINFORM - اقتوبە وبلىسىنىڭ بىرنەشە ەلدى مەكەنىنە سۋى جايىلعان «ماگادجان» بوگەتى يەسىنىڭ ۇستىنەن سوتقا دەيىنگى تەرگەۋ ءجۇرىپ جاتىر. بۇل تۋرالى قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.

«اۋىر زارداپتارعا اكەپ سوققان مىندەتتەرگە نەمقۇرايلى قاراۋ فاكتىسى بويىنشا اقتوبە وبلىسىنداعى «ماگادجان» بوگەتىن سەنىمگەرلىك باسقارۋعا العان ج ش س باسشىسىنا قاتىستى سوتقا دەيىنگى تەرگەۋ باستالدى.

انىقتالعانداي، 2014 -جىلى بۇل بوگەت بالىق شارۋاشىلىعىن جۇرگىزۋ ماقساتىندا جەكە كومپانياعا سەنىمگەرلىك باسقارۋعا بەرىلگەن. الايدا سەرىكتەستىك تاراپىنان، بوگەتتى كۇتىپ ۇستاۋ جانە قىزمەت كورسەتۋ بويىنشا ءوز مىندەتتەرى تيىسىنشە ورىندالماعان»، - دەدى الىبەك ءابدىلوۆ.

ونىڭ سوزىنشە، مۇنداي سالعىرتتىقتىڭ سالدارى بيىل بىرنەشە ەلدى مەكەننىڭ تۇرعىنىن ابىگەرگە تۇسىرگەن.

«ماسەلەن، بيىلعى 5-ساۋىردە اقتوبە وبلىسىنىڭ حرومتاۋ اۋدانىندا ورنالاسقان «ماگادجان» بوگەتى بۇزىلدى.

سۋ تاسقىنى ناتيجەسىندە العا اۋدانىنىڭ بەسقوسپا، قىزىلتۋ جانە تابانتال اۋىلىنان 215 ادام، ونىڭ ىشىندە 96 بالا، سونداي-اق اقتوبە قالاسى ەلەك جانە قارعالى وزەنىنىڭ ماڭىندا ورنالاسقان باۋ- باقشا ۇجىمدارىنىڭ تۇرعىندارى ەۆاكۋاتسيالاندى»، - دەدى رەسمي وكىل.

بۇل ءىس بويىنشا سوتقا دەيىنگى تەرگەۋ امالدارى ءجۇرىپ جاتىر. سول تەرگەۋدىڭ قورىتىندىسى بويىنشا ىسكە قاتىسى بار لاۋازىمدى تۇلعالاردىڭ ارەكەتىنە قۇقىقتىق باعا بەرىلەدى.

اۆتور
ەسىمجان ناقتىباي