اقتوبە فۋتبول كلۋبىنىڭ باسشىلارى 250 ميلليون تەڭگە قاراجات جىمقىرعان

اقتوبە. KAZINFORM - وبلىس پروكۋراتۋراسى باس پروكۋراتۋرانىڭ تاپسىرماسى بويىنشا اقتوبە فۋتبول كلۋبىنىڭ قىزمەتىن تەكسەردى.

تەكسەرىس بارىسىندا «اقتوبە» فۋتبول كلۋبىنىڭ باسشىلارى ويىنشىلاردىڭ تاماعى مەن اۋە تاسىمالىنا بولىنگەن 250 ميلليون تەڭگەگە قارجىسىن ماقساتتى جۇمساماي، جەپ قويعانى انىقتالدى.

ويىنشىلاردىڭ تاماقتانۋىنا بولىنگەن قاراجاتتى كلۋب قىزمەتكەرلەرى جەكە قاجەتتىلىكتەرىنە جۇمساعان.

- تەكسەرۋ قورىتىندىسى بويىنشا وبلىس پروكۋراتۋراسى قىلمىستىق كودەكستىڭ 189-بابىنىڭ 4-بولىگىنىڭ 2) تارماعى (اسا ءىرى مولشەردە سەنىپ تاپسىرىلعان بوتەن مۇلىكتى جىمقىرۋ)، 361-بابىنىڭ 4-بولىگىنىڭ 1) تارماعى (لاۋازىمدىق وكىلەتتىكتەردى تەرىس پايدالانۋ) جانە 190-بابىنىڭ 4-بولىگىنىڭ 2) تارماعى (الاياقتىق) بويىنشا 3 سوتقا دەيىنگى تەرگەپ-تەكسەرۋدى باستادى، - دەلىنگەن حابارلامادا.

قىلمىستىق ىستەر تەرگەپ-تەكسەرۋ امالدارىن جۇرگىزۋ ءۇشىن سىبايلاس جەمقورلىققا قارسى قىزمەتكە جولداندى.

ىستەردىڭ تەرگەلۋى وبلىس پروكۋراتۋراسىنىڭ باقىلاۋىندا.