اقتاۋلىق دارىگەرلەر ناۋقاستىڭ موينىنان 1 كەلىدەي ىسىكتى الىپ تاستادى

اقتاۋ. قازاقپارات - 74 جاستاعى جاڭاوزەن قالاسىنىڭ تۇرعىنى بالحيا سۇندەتبايەۆانىڭ موينىنداعى ىسىك 15 جىل بۇرىن پايدا بولعان. وسى كەزگە دەيىن ول ۇلعايىپ، زەينەتكەرگە كوپ قيىندىق اكەلگەن. قاتتى اۋىرسىنۋ مەن تۇراقتى دەنە قىزۋىنىڭ كوتەرىلۋىنە شىداۋعا تۋرا كەلگەن.

اقتاۋلىق بىلىكتى ماماندار وتا جاساماس بۇرىن، ناۋقاستىڭ دەنساۋلىعىن مۇقيات تەكسەرىپ، ىسىكتىڭ قاۋىپتى ايماقتا ورنالاسقانىن انىقتادى. ول ءىرى قان تامىرلارى مەن جۇيكە تالشىقتارىنا تىم جاقىن ورنالاسقان بولىپ شىقتى. دەسە دە، ماماندار تاۋەكەلگە بەل بۋىپ، وتا جاساعان.

دارىگەرلەر توبى اسا كۇردەلى وتانى 4 ساعات جاساپ، 1 كەلىگە جۋىق ىسىكتى ءساتتى الىپ تاستادى.

وتادان كەيىن ناۋقاستىڭ قان قىسىمى مەن جالپى دەنساۋلىق كورسەتكىشتەرى قالىپقا كەلىپ، اۋىرسىنۋسىز ۇيىقتاي باستاعان.

- دارىگەرلەر ماعان ەكىنشى ءومىر سىيلادى. ءومىر بويى ولارعا العىسىمدى ايتامىن، - دەيدى بالحيا سۇندەتبايەۆا.

بۇعان دەيىن، ماڭعىستاۋلىق قۇتقارۋشىلار اتىراۋ وبلىسىنا كومەككە اتتانعانى تۋرالى جازعان بولاتىنبىز.

اۆتور

اياگوز ءىزباساروۆا