اقتاۋداعى ۇشاق اپاتى: سوتقا دەيىنگى تەرگەۋ باستالدى

استانا. KAZINFORM - اقتاۋداعى ماڭىنداعى ۇشاق اپاتقا ۇشىراعان وقيعا ورنىنا بىرنەشە قۇقىق قورعاۋ ورگاندارىنىڭ وكىلى جىبەرىلدى. بۇل تۋرالى كولىكتەگى پوليتسيا دەپارتامەنتىنىڭ باسپا ءسوز قىزمەتى حابارلادى.

- وقيعا ورنىنا دەرەۋ ىشكى ىستەر مينيسترلىگىنىڭ، كولىكتەگى پوليتسيا دەپارتامەنتىنىڭ جانە باس كولىك پروكۋراتۋراسىنىڭ باسشىلىعى، سونداي-اق جەدەل-تەرگەۋ توبى شىقتى، - دەلىنگەن حابارلامادا.

قازىر اپاتتىڭ بارلىق جاعدايى مەن سەبەپتەرى انىقتالىپ جاتىر.

- قازاقستان رەسپۋبليكاسى قىلمىستىق كودەكسىنىڭ 344-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋ باستالدى (كولىك قۇرالىن پايدالانۋ كەزىندە قاۋىپسىزدىك قاعيدالارىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتىرۋ)، - دەيدى دەپارتامەنتتەن.

وزگە اقپارات قىلمىستىق-پروتسەسسۋالدىق كودەكستىڭ 201-بابىنا سايكەس جاريا ەتۋگە جاتپايدى.

ايتا كەتەيىك، ق ر پرەزيدەنتىنىڭ تاپسىرماسىمەن اۋە اپاتىنا بايلانىستى مەملەكەتتىك كوميسسيا قۇرىلدى.

سونداي-اق، ماڭعىستاۋ وبلىسىنىڭ اكىمى ۇشاق اپاتى بولعان جەرگە باردى.

اپاتقا ۇشىراعان ۇشاق بورتىندا قازاقستاننىڭ 6 ازاماتى بولدى.

ق ر كولىك مينيسترلىگى ءمالىم ەتكەندەي، ازەربايجان تاراپىنىڭ الدىن الا اقپاراتى بويىنشا، بورتتا 62 جولاۋشى مەن 5 ەكيپاج مۇشەسى بولعان.