اقتاۋدا قوعامدىق كولىكتەر جۇرمەي جاتىر. سەبەبى بەلگىلى بولدى
اقتاۋ. KAZINFORM - بۇگىن اقتاۋدا قوعامدىق كولىكتەردىڭ جۇرگىزۋشىلەرى نارازىلىقتارىن ءبىلدىرىپ، جۇمىسقا شىقپاي قالدى. ولار جالاقىنى كوتەرىپ، جۇمىستا جاعداي جاساۋدى، الەۋمەتتىك قولداۋ كورسەتۋدى سۇرايدى.
اۆتوبۋس جۇرگىزۋشىلەرىنىڭ ايتۋىنشا، ولارعا كۇنىنە 23 مىڭ تەڭگە تولەنەدى.
ال، باسقا وڭىرلەردە 37-43 مىڭ تەڭگە ارالىعىندا تولەيدى.
سونىمەن قاتار، 2 كۇن جۇمىس ىستەپ، 2 كۇن دەمالۋدىڭ ورنىنا ولارعا 10 كۇن قاتارىنان جۇمىس ىستەۋگە تۋرا كەلۋدە.
- تالابىمىز - كۇنىنە 40-45 مىڭ تەڭگە بەرسە، حالىققا قىزمەت جاساۋعا دايىنبىز.
باسشىلىقتىڭ وتىنىشىمەن بىزدەر 10 كۇنگە دەيىن جۇمىس ىستەپ جاتىرمىز. ءبىرىنشى قيىندىعىمىز وسى - شارشاۋ.
ەكىنشىسى - اسىعىستىق. ۋاقىت قويىلادى، قانشا شارشاپ جۇرسەڭ دە سول ۋاقىتقا جەتۋىڭ كەرەك.
كەشىكسەڭ تۇرعىندار دا ايقاي شىعارادى، - دەيدى اۆتوبۋس جۇرگىزۋشىسى باۋىرجان جۇمانيازوۆ.
جۇرگىزۋشىلەر دەمالماسسىز جۇمىس ىستەۋدىڭ سالدارىنان، جول كولىك اپاتتارى بولىپ جاتقانىن ايتادى.
- 10 كۇن جۇمىس ىستەگەن جىگىت ۇيىقتاپ كەتىپ، جول كولىك اپاتىن جاسادى. جۇرگىزۋشى جەتپەيدى، امال جوق، شىعاسىڭ دەنىڭ ساۋ بولعاسىن. ارتىڭدا قىمباتشىلىق قىسىپ تۇر، اقشا كەرەك، شارشاعانىڭا قاراماي اۆتوبۋس جۇرگىزەسىڭ. سونى كوتەرە الماي اپات جاساپ جۇرگەندەر كوپ، - دەيدى باۋىرجان جۇمانيازوۆ.
جۇرگىزۋشىلەردىڭ ايتۋىنشا، ولاردا تۇسكى اس ىشەتىن دە ۋاقىت جوق. نارازىلىقتارىن بىلدىرۋگە ءنومىرى 1، 4، 5، 6، 7، 8، 9، 3 جانە قالا - اۋدان ارالىق اۆتوبۋستاردىڭ جۇرگىزۋشىلەرى جينالدى.
- تاڭعى 5 تە ۇيلەرىنەن شىعىپ، گاراجعا كەلەدى، سودان كەيىن تۇنگى ساعات 22 گە دەيىن جۇرەدى. كەلىسىمشارتتا جۇمىس ۋاقىتى تاڭعى 6 دان كەشكى 18:30 عا دەيىن دەپ كورسەتىلگەن. جول-كولىك اپاتتارىنىڭ كوبى سودان، ۇيىقتاپ كەتەتىنى بار، تۇسكى ءۇزىلىس جوق. ۋاقىتقا ۇلگەر دەيدى. قازىر قازاقستان بويىنشا جىلدامدىقتى ساعاتىنا 50 شاقىرىمعا ءتۇسىرىپ قويدى عوي. مەن ساياجايدا جولاۋشى تاسيمىن، و شەتى مەن بۇ شەتىنە 53 مينۋت بەرىپ تۇر. ساعاتىنا 50 شاقىرىممەن قالاي ۇلگەرەسىڭ؟ وعان قوسا، قازىر كوندۋكتوردى الىپ تاستادى. ءبارى ساپاسىز قىزمەتكە اكەلەدى، - دەيدى قوعامدىق كولىك جۇرگىزۋشىسى يتەمگەن جەتەكوۆ.
بۇعان دەيىن، اقتاۋدا قوعامدىق كولىكتەر جۇرمەي جاتقانى تۋرالى جازعان ەدىك.
اۆتور
اياگوز ءىزباساروۆا
