اقتاۋدا جاس ءوسپىرىم قىزدى ۇرىپ-سوققاندار ۇستالدى

اقتاۋ. KAZINFORM - الەۋمەتتىك جەلىدە جاس ءوسپىرىم قىزدىڭ ءوزى قاتارلاس قىزدى باسىنان ۇرىپ جاتقان بەينەجازباسى جانە جاسوسپىرىمدەردىڭ اتا-انالارىنىڭ وقيعاعا قاتىستى ايتقان سوزدەرى تارادى.

اتا-انالاردىڭ ايتۋىنشا، قالادا جاس ءوسپىرىم قىزداردان قۇرالعان توپ بار. ولار جەتكىنشەكتەردى قاتارىنا قوسىپ الادى. ەگەر كوڭىلدەرىنەن شىقپاسا، قىسىم كورسەتىپ، ۇرادى.

- مەنىڭ قىزىم اقىماقتىق جاساپ، سولاردىڭ قاتارىنا قوسىلعان. ول قىزدار ساۋدا ورتالىقتارىنىڭ جانىندا ءجۇرىپ، جەتكىنشەكتەردى سوزگە تارتىپ، سۇلۋ، ءساندى قىز ەكەنىن ايتىپ، دوس بولۋعا شاقىرادى. بالالار قىزىعىپ قوسىلىپ كەتەدى. ۋاقىت وتە ولار مانيپۋلياتسيا جاساپ، قورقىتىپ، ۇركىتەدى ەكەن. سونىڭ ءبارىن بەينەجازباعا ءتۇسىرىپ، جەلىگە جۇكتەيدى، - دەيدى اتا-انالاردىڭ ءبىرى.

تاعى ءبىر اتا-انا سوتقار قىزدارعا قاتىستى ءبىر وقيعانى ايتىپ بەردى.

- ماعان ءبىر تانىسىم 12 جاستاعى قىزىمدى ساۋدا ورتالىعىنىڭ قاسىندا ۇرىپ جاتىر دەپ قوڭىراۋ شالدى. قىزىما تەلەفون سوقسام، كوتەرمەيدى. قاس قارايعان كەز ەدى. جولداسىم ەكەۋمىز بىردەن ايتقان جەرگە باردىق. كەلسەك 20-30 جاس ءوسپىرىم ءجۇر. تۇسىنگەنىم ءبىر توپ قىز سول كەزدە 2 جاس ءوسپىرىم قىزدى ۇرىپ تاستاعان. مەنىڭ قىزىم زارداپ شەكپەپتى. ءبىز بىردەن پوليتسيا شاقىردىق، - دەيدى ەكىنشى اتا-انا.

ماڭعىستاۋ وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، ۇرىپ-سوعۋ دەرەگى بويىنشا سوتقا دەيىنگى تەرگەۋ باستالعان. وقيعاعا قاتىستى بارلىق كۇدىكتى انىقتالىپ، ۇستالعان.

- كۇدىكتىلەردىڭ زاڭدى وكىلدەرى كامەلەتكە تولماعان بالانى تاربيەلەۋ، ولاردىڭ قۇقىقتارى مەن مۇددەلەرىن قورعاۋ، ولاردىڭ قاۋىپسىزدىگىن قامتاماسىز ەتۋ جونىندەگى شارالاردى ورىنداماۋ دەرەگى بويىنشا اكىمشىلىك جاۋاپكەرشىلىككە تارتىلاتىن بولادى. ماتەريال اكىمشىلىك جانىنداعى كامەلەتكە تولماعانداردىڭ قۇقىقتارىن قورعاۋ جونىندەگى كوميسسياعا جىبەرىلەدى. قۇقىق بۇزۋشى جەتكىنشەكتەر پروفيلاكتيكالىق ەسەپكە قويىلدى. قازىرگى ۋاقىتتا وقيعانىڭ ءمان-جايىن انىقتاۋ ءۇشىن جان-جاقتى تەرگەۋ ارەكەتتەرى جۇرگىزىلۋدە، - دەلىنگەن حابارلامادا.

اۆتور
اياگوز ءىزباساروۆا