اقتاۋدا بىرلەسكەن اسكەري-تەڭىز جاتتىعۋلارى ءوتىپ جاتىر
اقتاۋ. KAZINFORM - اقتاۋدا قازاقستان مەن ازەربايجان اسكەري-تەڭىز كۇشتەرىنىڭ «كاسپي سامالى-2025» بىرلەسكەن وقۋ- جاتتىعۋلارىنىڭ سالتاناتتى اشىلۋ ءراسىمى ءوتتى. بۇل تۋرالى قورعانىس مينيسترلىگى ءمالىم ەتتى.
وعان ەكى مەملەكەتتىڭ قولباسشىلىعى مەن اسكەري قىزمەتشىلەرى قاتىستى. ءداستۇر بويىنشا ءىس-شارا اسكەري وركەستردىڭ مەملەكەتتىك ءانۇرانداردى ورىنداۋى مەن ەكى ەلدىڭ تۋلارىن كوتەرۋدەن باستالدى.
اسكەري كونتينگەنتتەردى قازاقستان اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى - باس شتاب باستىعى 1-دارەجەلى كاپيتان قانات نيازبەكوۆ جانە ازەربايجان اسكەري-تەڭىز كۇشتەرى قولباسشىسىنىڭ ءبىرىنشى ورىنباسارى - شتاب باستىعى 1-دارەجەلى كاپيتان تەيمۋر مۋرشۋدوۆ قۇتتىقتادى.
بىرلەسكەن وقۋ-جاتتىعۋلار تەڭىز ەكونوميكالىق قىزمەتى نىساندارىنىڭ، اسكەري-تەڭىز كۇشتەرى مەن كەمە قاتىناسى پۋنكتەرىنىڭ قاۋىپسىزدىگىن ارتتىرۋعا باعىتتالعان.
1- دارەجەلى كاپيتان قانات نيازبەكوۆ اتاپ وتكەندەي، وقۋ-جاتتىعۋلار ەكىجاقتى ءوزارا ءىس-قيمىلدى نىعايتۋعا جانە كاسىبي تاجىريبە الماسۋعا ىقپال ەتەتىن بولادى.
ءىس-شارا شاعىن فۋتبول، ارمرەستلينگ، ارقان تارتۋ جانە ءجۇزۋ جارىستارىمەن اياقتالدى.
ايتا كەتەيىك، بۇعان دەيىن قازاقستاننىڭ اسكەري تەڭىزشىلەرى باحرەيندە سۋاستى مينالارىن تازارتۋعا قاتىساتىنىن جازعان ەدىك.
