اقتاۋدا ارالاس جەكپە-جەك چەمپيوناتىندا 17 جاستاعى سپورتشى قايتىس بولدى

اقتاۋ. KAZINFORM - اقتاۋدا NOMAD MMA سپورتىنان وتكەن وبلىس چەمپيوناتى كەزىندە جاس ءوسپىرىم بالا قايتىس بولدى.

سپورتشىنىڭ ءولىمى تۋرالى ماڭعىستاۋ وبلىستىق NOMAD MMA فەدەراتسياسىنىڭ وكىلدەرى مالىمدەدى. اتالعان چەمپيونات اقتاۋ قالاسىنداعى «باتىر» سپورت كەشەنىندە وتكەن.

«جەكپە-جەك كەزىندە 17 جاستاعى سپورتشى قۇلاپ قالدى. وعان العاشقى كومەكتى «باتىر» سپورت كەشەنىنىڭ مەديتسينالىق قىزمەتكەرلەرى كورسەتتى. وقيعا ورنىنا جەدەل جاردەم كەلدى. وكىنىشكە قاراي، جاس جىگىتتى ولىمنەن اراشالاپ قالا المادى. تۋرنير باستالماس بۇرىن جاتتىقتىرۋشى ءوتىنىم بەرگەن كەزدە قاتىسۋشىنىڭ جارىسقا دايىندىعىن راستايتىن مەديتسينالىق انىقتاما بەردى. قازىرگى ۋاقىتتا تەرگەۋ امالدارى ءجۇرىپ جاتىر. قۇزىرلى ورگاندار بولعان وقيعانىڭ بارلىق ءمان-جايىن زەرتتەپ جاتىر. ءبىز مارقۇم سپورتشىنىڭ جاقىندارىنا قايعىرىپ كوڭىل ايتامىز»، - دەدى ماڭعىستاۋ وبلىستىق Nomad MMA فەدەراتسياسىنىڭ وكىلدەرى.

ماڭعىستاۋ وبلىستىق چەمپيوناتى 30-31-ناۋرىز كۇندەرى ءوتىپ، NOMAD MMA سپورتىنان بالالار، جاسوسپىرىمدەر، جاستار جانە ەرەسەكتەر بويىنشا 300 گە جۋىق سپورتشى سىنعا ءتۇستى.

اۆتور

باقىتگۇل اباي قىزى