اقتاۋدا 85 جاستاعى اجەي ۋنيۆەرسيتەتتە وقىپ ءجۇر
اقتاۋ. KAZINFORM - اقتاۋدا Yessenov University دە اقپان ايىنان باستاپ «كۇمىس ۋنيۆەرسيتەتى» جوباسى اياسىندا ەگدە جاستاعى ادامداردى وقىتۋ باستالدى. اتالعان تۋريستىك كۋرس گيد-ەكسكۋرسوۆودتاردى دايىنداۋعا باستالعان.
ءۇش ايلىق كۋرستىڭ سوڭىندا كۇمىس ۋنيۆەرسيتەتىنىڭ تۇلەكتەرى سەرتيفيكاتتار الىپ، ماڭعىستاۋ وبلىسىنىڭ تۋريزم باسقارماسىمەن مەموراندۋم اياسىندا وڭىرگە دەمالىسقا كەلەتىن تۋريستەر ءۇشىن ەكسكۋرسوۆود رەتىندە جۇمىسقا ورنالاسادى.
قازىرگى ۋاقىتتا مۇندا ەگدە جاستاعى 70 دەن استام تىڭداۋشى ءبىلىم الىپ ءجۇر.
سولاردىڭ قاتارىندا اقتاۋلىق 85 جاستاعى ليۋدميلا كۋلەشوۆا دا بار.
«كۇمىس ۋنيۆەرسيتەتتە» وقۋ ارقىلى گيد- ەكسكۋرسوۆود بولۋ ءۇشىن پارتاعا قايتا وتىردىم. ماڭعىستاۋدا تۋىپ-ءوستىم. سوندىقتان ءوڭىر بويىنشا ومىرلىك تاجىريبەم مول. «كۇمىس ۋنيۆەرسيتەت» - زەينەتكەرلەر ءۇشىن ءوز كوكجيەگىن كەڭەيتۋگە، ءبىلىمىن كورسەتۋگە، ەكسكۋرسياعا بارۋعا جانە ولكەمىزدىڭ شەكسىز سۇلۋلىعىن كورۋگە تاماشا مۇمكىندىك بولىپ وتىر»، - دەيدى اقتاۋ قالاسىنىڭ تۇرعىنى ليۋدميلا كۋلەشوۆا.
ماڭعىستاۋ وبلىسىندا جىل سايىن تۋريستەر سانى ارتىپ وتىرعانى بايقالادى. بىلتىر قازان ايىنا دەيىن وڭىرگە 325 مىڭنان استام تۋريست كەلگەن.
وسى ورايدا گيدتەرگە دەگەن سۇرانىس ارتىپ وتىر.
«ەلىمىزدە 2021-جىلدان باستاپ „كۇمىس ۋنيۆەرسيتەتى» جوباسى قولعا الىنىپ، جوعارى بۋىن وكىلدەرىنە ءتۇرلى باعىتتار بويىنشا ءبىلىم مەن داعدىلاردى الۋعا مۇمكىندىك بەرىلىپ وتىر. بۇل رەتتە ارناۋلى كۋرس گيد-ەكسكۋرسوۆود مامانداردى دايارلاۋعا ۇلەس قوسادى»، - دەيدى Yessenov University وكىلدەرى.
