اقتاۋ اۋەجايىنا قاتىستى تەرگەۋ قايتا جالعاسادى
اقتاۋ. KAZINFORM - باسەكەلەستىكتى قورعاۋ جانە دامىتۋ اگەنتتىگىنىڭ ماڭعىستاۋ وبلىسى بويىنشا دەپارتامەنتى «اقتاۋ حالىقارالىق اۋەجايى» ا ق- نا قاتىستى تەرگەپ-تەكسەرۋدى قايتا باستادى.
تەرگەۋگە اۆياوتىندى ساقتاۋعا ارنالعان رەزەرۆۋارلاردى جالعا بەرۋ قىزمەتى بويىنشا مونوپوليالىق جوعارعى باعا بەلگىلەۋ نەگىز بولىپ وتىر.
«اۆياوتىندى ساقتاۋ ەرەكشە تاۋار نارىعىنا جاتادى. اۋەجايدا قىزمەت كورسەتۋ قاعيدالارىنا سايكەس، اۆياكومپانيالار تاسىمالداۋ قىزمەتىن جۇزەگە اسىرۋ ءۇشىن اۆياتسيالىق وتىننىڭ ساقتالۋىن اۋەجايدىڭ ءوزى قامتاماسىز ەتۋى كەرەك. الايدا ونىڭ ورنىنا اۋەجاي زاڭنامادا كوزدەلگەن تىكەلەي مىندەتتەمەسىنەن ءوزىن-ءوزى شەتتەتىپ، رەزەرۆۋاردى ءتيىستى تاۋار نارىعىنداعى ەڭ جوعارى باعامەن اۆياكومپانيالارعا جالعا بەرگەن. اۋەجاي مونوپولياعا قارسى ۆەدومستۆونىڭ دالەلدەرىمەن كەلىسپەي، مونوپولياعا قارسى ورگاننىڭ تەكسەرۋ جۇرگىزۋ تۋرالى بۇيرىعىن زاڭسىز دەپ تانۋ جانە كۇشىن جويۋ جونىندە سوتقا تالاپ ارىز تۇسىرگەن بولاتىن. ۇزاققا سوزىلعان (1 جىل 3 اي) سوت ناتيجەسىندە جوعارعى سوتتىڭ قاۋلىسىمەن تالاپكەردىڭ شاعىمى قاناعاتتاندىرۋسىز قالدىرىلدى» دەپ جازىلعان ۆەدومستۆو تاراتقان اقپاراتتا.
قازىرگى ۋاقىتتا تەرگەۋ جالعاسىپ جاتىر.
ەلىمىزدىڭ مونوپولياعا قارسى زاڭناماسى بويىنشا زاڭ بۇزۋ دەرەكتەرى انىقتالعان جاعدايدا ءتيىستى شارالار قابىلدانباق.
