اقمولالىق اسىقشى كوشپەندىلەر ويىنىنا قىزۋ دايىندالىپ جاتىر
كوكشەتاۋ. KAZINFORM - اقمولا وبلىسىنىڭ اسىق اتۋدان اعا جاتتىقتىرۋشىسى، جوعارى ساناتتى باپكەر سامات اۋكەنوۆتىڭ قىرعىزستاندا وتكەن العاشقى دۇنيەجۇزىلىك كوشپەندىلەر ويىندارىنا سپورتشى رەتىندە قاتىسقانىنا بيىل تۋرا 10 جىل بولدى.
ول كەزدە ول ءتورتىنشى ورىننان كورىنگەن ەدى. بيىل استانادا وتەتىن V دۇنيەجۇزىلىك كوشپەندىلەر ويىنىندا اقمولا وبلىسىنىڭ نامىسىن ونىڭ 19 جاستاعى شاكىرتى كوگەرشىن دۋمان قورعايدى.
ۇلتتىق ونەردى دارىپتەپ كەلە جاتقان اسىقشى مەن ونىڭ تاجىريبەلى جاتتىقتىرۋشىسى الداعى دوداعا دايىندىعى بارىسى تۋرالى ايتىپ، جوسپارىن ءبىلىستى.
«جاسىم ون توعىزدا، زەرەندى اۋدانىنىڭ ورتاعاش اۋىلىندا تۋىپ ءوستىم. قازىر كوكشەتاۋ قالاسىندا تۇرامىن. ەس بىلگەلى اسىق ويناپ كەلەمىن. اسىق اتۋدى العاش رەت انام ۇيرەتتى. كوكشەتاۋدا باپكەرىم سامات اۋكەنوۆتىڭ اسىق ۇيىرەمەسىنە بارىپ، شەبەرلىگىمدى شىڭداي ءتۇستىم»، - دەيدى اسىقشى قىز.
كوكشەتاۋ قالاسىنداعى مەديتسينالىق كوللەدجىن ءتامامداعان كەيىپكەرىمىز كەلەشەكتە ماماندىعىن اۋىستىرىپ، دەنە شىنىقتىرۋ ءپانىنىڭ مۇعالىمى بولۋدى ارماندايدى.
جاتتىقتىرۋشىسى سامات اۋكەنوۆتىڭ ايتۋىنشا، كوگەرشىنىڭ تۋعان اپكەسى ايلانا دا اسىق اتۋدىڭ حاس شەبەرى، ءتۇرلى جارىستاردا توپ جارىپ جۇرگەن اسىقشى.
كوگەرشىن زەرەندى اۋدانى اتىنان قاتىسقان وقۋشىلار اراسىندا وتكەن جارىستاردا كوزىنە تۇسكەن. ول شەبەرلىگىمەن جانە جەڭىسكە دەگەن قۇلشىنىسىمەن ەرەكشەلەندى.
«كوگەرشىن 2023 -جىلى ەڭ جاقسى ناتيجە كورسەتتى، سوندىقتان 2024 -جىلى ق ر قۇراماسىنا ءتۇستى. وبلىستىق دەڭگەيدە ول ءارقاشان ءبىرىنشى ورىنداردى يەلەندى. 2023 -جىلى تۇركيادا وتكەن ەۋرازيا كۋبوگىندا 2-ورىننان كورىندى. 2023 -جىلدىڭ تامىز ايىندا پاۆلوداردا قازاقستان كۋبوگىندا، قىركۇيەك ايىندا رۋمىنيادا الەم كۋبوگىندا دا چەمپيون اتاندى. قازىر ول - اقمولا وبلىسىندا اسىق اتۋ ويىنى بويىنشا ءبىرىنشى ءنومىرلى سپورتشى»، - دەپ ءبولىستى سامات اۋكەنوۆ.
سپورتشىنىڭ ءوزى بولسا، وسى كۇنگە دەيىنگى ءدۇبىرلى دودالارداعى بۇكىل جەتىستىكتەرىنە باپكەرلەرىنىڭ ارقاسىندا قول جەتكىزدىم دەپ وتىر.
قىركۇيەك ايىندا قازاقستاندا V دۇنيەجۇزىلىك كوشپەندىلەر ويىندارى وتەدى.
وسى بايراقتى جارىسقا ۇلتتىق قۇراما ساپىندا كوگەرشىن دۋمان دا قاتىسىپ، ەل نامىسىن قورعايدى. ول وسىناۋ جارىسقا اقپان ايىنان باستاپ تىڭعىلىقتى دايىندالۋ ۇستىندە.
تامىزدىڭ 27-دە استانا قالاسىنا اتتانىپ، سوندا بەسىنشى، ياعني جارىس الدىنداعى سوڭعى دايىندىق جيىنىن وتكىزەمىز. بۇعان دەيىن الماتى، شۋچە، پەتروپاۆل جانە تۇركىستاندا دايىندالدىق. كوڭىل كۇيىم جاقسى، بار كۇش- جىگەرىمدى كوشپەندىلەردىڭ دۇنيەجۇزىلىك ويىندارىنىڭ چەمپيونى جانە ازيا چەمپيونى بولۋعا سارىپ ەتەمىن»، - دەپ قوستى بويجەتكەن.
كوگەرشىننىڭ چەمپيون بولاتىنىنا جاتتىقتىرۋشىسى دا ۇلكەن سەنىپ ارتىپ وتىر.
ەسكە سالايىق، بۇدان بۇرىن ارقان تارتىستان ۇلتتىق قۇراما قارسىلاستارىنا ارنايى تاكتيكا قۇرىپ جاتقانىن جازعان ەدىك.
اۆتور
اسلان وسپانوۆ
