اقمولا وبلىسىندا بىرنەشە اۋىل تاراتىلادى

استانا. KAZINFORM - «اشىق ن ق ا» پورتالىندا اقمولا وبلىسىنىڭ اكىمشىلىك-اۋماقتىق قۇرىلىمىنا وزگەرىستەر ەنگىزۋ بويىنشا ءبىرقاتار ۇسىنىس جاريالاندى.

اقمولا وبلىسى اكىمدىگىنىڭ قاۋلىسى مەن وبلىستىق ءماسليحاتتىڭ «اقمولا وبلىسىنىڭ اكىمشىلىك-اۋماقتىق قۇرىلىمىن وزگەرتۋ تۋرالى» بىرلەسكەن شەشىمىنە سايكەس، بىرنەشە اۋىلدى باسقا ەلدى مەكەندەر ساناتىنا جاتقىزىپ، ەسەپتىك دەرەكتەردەن شىعارۋ كوزدەلگەن. تاراتىلاتىن اۋىلدار:

- اقبەيىت (استراحان اۋدانى)؛

- جولباسشى (ەرەيمەنتاۋ اۋدانى)؛

- ۇلگىالعان، قاراعاي، جاڭاتۋعان، فەدوسەيەۆكا، ىنتالى (بۋراباي اۋدانى)؛

- ەرۋسلانوۆكا، ۇلتۋعان، دوبروۆولنوە، كراسنوسەلسكوە، بالۋان شولاق، پۋشكين (بۇلاندى اۋدانى)؛

- چاشكە (ساندىقتاۋ اۋدانى).

ودان بولەك ءوڭىردىڭ كەيبىر اۋدانىندا اكىمشىلىك-اۋماقتىق وزگەرىستەر جوسپارلانىپ وتىر. اتاپ ايتقاندا، تسەلينوگراد اۋدانىنىڭ قىزىلسۋات اۋىلدىق وكرۋگى شەگىندە جاڭا اۋىل قۇرىلىپ، وعان «نۇرلى» اتاۋى بەرىلەدى. ەگىندىكول اۋدانىنىڭ سپيريدونوۆكا جانە اباي اۋىلدارىن بىرىكتىرىپ، سپيريدونوۆسكي اۋىلدىق وكرۋگى قۇرىلىپ، ونىڭ ورتالىعى سپيريدونوۆكا اۋىلى بولادى.

بۇلاندى اۋدانىنىڭ ايناكول اۋىلدىق وكرۋگى تاراتىلىپ، ايناكول جانە وستروگوركا اۋىلدارى جۋراۆليەۆ اۋىلدىق وكرۋگىنىڭ اكىمشىلىك-اۋماقتىق قاراماعىنا بەرىلەدى. سونداي-اق، ءبىرجان سال اۋدانىنىڭ ۆاليحانوۆ اۋىلدىق وكرۋگىنە قاراستى اقسۋ اۋىلى تاراتىلىپ، ۆاليحانوۆو اۋىلىنا قوسىلادى. اقكول اۋدانىنىڭ جالعىزقاراعاي اۋىلدىق وكرۋگىنە قاراستى قاينار اۋىلى دا تاراتىلىپ، جالعىزقاراعاي اۋىلىنا بىرىكتىرىلەدى. اقكول قالاسىنا قاراستى ەرنازار اۋىلىنىڭ اكىمشىلىك باعىنىستىلىعى وزگەرتىلىپ، ۋريۋپين اۋىلدىق وكرۋگىنە بەرىلەدى.

ارشالى اۋدانىنداعى جىبەك جولى اۋىلىنا كەنت مارتەبەسى بەرىلىپ، جىبەك جولى اۋىلدىق وكرۋگىنىڭ قۇرامىنان شىعارىلىپ، وكرۋگ ورتالىعى جالتىركول اۋىلى بولىپ بەلگىلەنەدى.

قۇجات جوباسى بيىل 17-ساۋىرگە دەيىن قوعامدىق تالقىلاۋعا ۇسىنىلىپ وتىر، ال 2025-جىلعى ماۋسىمدا ىسكە اسىرۋ جوسپارلانعان.

ايتا كەتسەك، جىل باسىندا كەنتاۋ قالاسىنىڭ اۋماعى ۇلعاياتىنى تۋرالى حابارلاعان ەدىك.