اقمولا وبلىسىندا 6 جاسار بالا بەس كۇننەن بەرى تابىلماي جاتىر

استانا. KAZINFORM - اقمولا وبلىسىندا پوليتسەيلەر مەن ەرىكتىلەر جوعالىپ كەتكەن 6 جاسار بالانى ىزدەستىرىپ جاتىر، دەپ حابارلايدى اقمولا وبلىسى پوليتسيا دەپارتامەنتىنىڭ باسپا ءسوز قىزمەتى.

2025 -جىلدىڭ 30-ساۋىرىندە اقمولا وبلىسى قورعالجىن اۋدانىنىڭ پوليتسيا بولىمىنە جەرگىلىكتى تۇرعىننان 2019 -جىلى تۋعان التى جاسار ۇلى قالمىرزا جانداۋلەتتىڭ جوعالىپ كەتكەنى تۋرالى ارىز تۇسكەن. اناسىنىڭ ايتۋىنشا، بالا ساعات 19:00 شاماسىندا ۇيدەن شىعىپ، قايتا ورالماعان.

الدىن الا مالىمەت بويىنشا، بالا جوعالعان كۇنى ادامدار ونى نۇرا وزەنىنىڭ ماڭىنان كورگەن، سودان كەيىن ونىڭ قايدا ەكەنى بەلگىسىز.

پوليتسياعا تۇسكەن اقپارات بويىنشا، بالا ارىقشا كەلگەن، شاشى قارا، كوزى قوڭىر. جوعالىپ كەتكەن كەزدە ۇستىندە قىزعىلت سارى ءتۇستى كۇرتە، قارا كولگوتكي جانە قوڭىر ءتۇستى كروسسوۆكا بولعان.

ىزدەستىرۋ شارالارىنا پوليتسيا قىزمەتكەرلەرى، توتەنشە جاعدايلار ءبولىمىنىڭ قىزمەتكەرلەرى، ەرىكتىلەر مەن جەرگىلىكتى تۇرعىندار جۇمىلدىرىلعان. بالانىڭ بولۋى مۇمكىن بارلىق ورىندار، سونىڭ ىشىندە وزەننىڭ جاعالاۋى تەكسەرىلىپ جاتىر. پوليتسيا قىزمەتكەرلەرى بارلىق تۇرعىندى قىراعى بولىپ، جانداۋلەتتىڭ جۇرگەن جەرى تۋرالى مالىمەت بىلگەن جاعدايدا دەرەۋ 102 نومىرىنە نەمەسە جاقىن جەردەگى پوليتسيا بولىمشەسىنە حابارلاسۋدى سۇرايدى.

اۆتور

زارينا تۋعانبايەۆا