اقمارال ءالنازاروۆا: ۇلتتىق جوبادان 16,5 ميلليارد تەڭگەنى ۇنەمدەدىك
استانا. KAZINFORM - دەنساۋلىق ساقتاۋ مينيسترلىگى «اۋىلداعى دەنساۋلىق ساقتاۋ جۇيەسىن جاڭعىرتۋ» ۇلتتىق پيلوتتىق جوباسىن ىسكە اسىرۋ كەزىندە بيۋدجەتتىڭ 16,5 ميلليارد تەڭگەسىن ۇنەمدەپ قالعان. بۇل تۋرالى اقمارال ءالنازاروۆا ۇكىمەت وتىرىسىندا ءمالىم ەتتى.
جوبا اياسىندا اۋىلدىق ەلدى مەكەندەردە 655 مەديتسينالىق-سانيتاريالىق العاشقى كومەك كورسەتۋ ۇيىمىن اشۋ جوسپارلانعان بولاتىن. بۇگىندە سونىڭ 467 سى سالىنىپ بىتكەن. قالعان 188 نىساننىڭ قۇرىلىسى بيىل اياقتالۋى كەرەك.
- جوبالاۋ كەزىندە ەتالوندىق جوبالاردى قايتا قولدانۋ ارقاسىندا 2 ميلليارد تەڭگە، ال قۇرىلىس جۇمىستارى كەزىندە 14,5 ميلليارد تەڭگە شاماسىندا بيۋدجەت قاراجاتى ۇنەمدەلدى.
بۇل نىسانداردىڭ قۇرىلىسى كەزىندە قولدانىلعان زاتتاردىڭ %71 ى جەرگىلىكتى ءونىم وندىرۋشىلەردىڭ ۇلەسىنە تيەسىلى، - دەدى ۆەدومستۆو باسشىسى.
اقمارال ءالنازاروۆا اتالعان جاڭا نىساندارعا 143 مەديتسينا قىزمەتكەرى كەرەك بولاتىنىن اتاپ ءوتتى.
- وڭىرلەردىڭ اكىمدىكتەرى قازىردەن باستاپ اۋىلعا جاڭادان كەلەتىن مامانداردى تارتۋ جانە ولاردى ۇستاپ قالۋ بويىنشا ءتيىستى جۇمىستاردى باستاۋلارى قاجەت.
655 نىساننىڭ قۇرىلىسى اياقتالىپ، ىسكە قوسىلعان كەزدە شامامەن 1 ميلليونعا جۋىق اۋىل تۇرعىنى قولجەتىمدى مەديتسينالىق-سانيتارلىق العاشقى كومەكپەن قامتىلادى، - دەدى ول.
بۇعان دەيىن پاۆلودار اۋىلدارىندا قايتارىلعان اكتيۆتەر ەسەبىنەن امبۋلاتوريالار سالىناتىنىن جازعان ەدىك.
