اقپارات ءمينيسترى سۋ باسقان اۋماقتاردا جۋرناليستەردىڭ جۇمىسىن شەكتەۋ تۋرالى پىكىر ءبىلدىردى
استانا. KAZINFORM - مادەنيەت جانە اقپارات ءمينيسترى ايدا بالايەۆا توتەنشە جاعداي رەجيمى جاريالانعان وڭىرلەردە جۋرناليستەردىڭ جۇمىسىن شەكتەۋ تۋرالى پىكىر ءبىلدىردى.
«كەشە عانا توتەنشە جاعدايلار قىزمەتىنىڭ وكىلدەرى باستاپقىدا ەۆاكۋاتسيادان باس تارتقان ادامداردى شۇعىل جاعدايدا قۇتقارۋعا ءماجبۇر بولدى. ارينە، ءبىز ءبىرىنشى كەزەكتە ادامداردىڭ قاۋىپسىزدىگى تۋرالى ايتىپ وتىرعاندىقتان، ولاردىڭ قۇزىرىندا زاڭنامالىق شەكتەۋ نورمالارى بار. ونىڭ ىشىندە جۋرناليستەر دە بار. مەن سىزدەرگە قازىر ناقتى ايتا المايمىن. ويتكەنى ءبىز استانادا وتىرمىز. ول جاقتا قانداي جاعداي بولىپ جاتىر؟ بالكىم سىزدەردىڭ وندا بارۋلارىڭىزعا بولمايتىنداي احۋال بار شىعار. سوندىقتان ءبارى ورنىققاننان كەيىن ءمان-جايدى انىقتايىق»، - دەدى ول ءماجىلىستىڭ جالپى وتىرىسىنان كەيىن ب ا ق وكىلىنىڭ ساۋالىنا بەرگەن جاۋابىندا.
جۋرناليست مۇنداي شەكتەۋ سەنزۋرانىڭ ءبىر ءتۇرى ەمەس پە، دەگەن ساۋال قويدى.
«قۇتقارۋ جۇمىستارى كەزىندە جۇمىس ىستەپ جۇرگەنىڭىزدە بىرەۋ باتىپ كەتسە، زارداپ شەكسە، كىم جاۋاپ بەرەدى؟ سوندىقتان زاڭنامادا بار تارتىپكە باعىنايىق. مەن ونى سەنزۋرا دەپ ەسەپتەمەيمىن، ادامداردىڭ ومىرىنە دەگەن قامقورلىق دەپ ەسەپتەيمىن»، - دەدى ايدا بالايەۆا.
وسىعان دەيىن ب ق و- دا جۋرناليستەردىڭ سۋ باسقان ايماقتارعا كىرۋىنە تىيىم سالىنعانى تۋرالى جازعان ەدىك.
