اق ءۇي ترامپتىڭ گازاداعى جاعدايدى رەتتەۋگە ارنالعان جوسپارىن جاريا ەتتى
استانا. KAZINFORM - قۇجات سوعىستى دەرەۋ توقتاتۋدى، تۇتقىنداردى الماسۋدى جانە گازانى حالىقارالىق كوميتەتتىڭ ۋاقىتشا باسقارۋىن قاراستىرادى، دەپ حابارلايدى انادولى.
اق ءۇي ا ق ش پرەزيدەنتى دونالد ترامپ ازىرلەگەن «گازاداعى قاقتىعىستى توقتاتۋدىڭ جان- جاقتى جوسپارى» دەپ اتالاتىن 20 تارماقتان تۇراتىن ۇسىنىستى جاريالادى.
اق ءۇي مالىمدەمەسىندە، بۇل جوسپاردى ەكى تاراپ تا قابىلداسا، «جاۋلاسۋ دەرەۋ توقتاتىلادى» جانە يزرايل كۇشتەرى «تۇتقىنداردى بوساتۋعا دايىندالۋ ءۇشىن كەڭەسەدى» دەپ اتاپ ءوتتى. وسى كەزەڭدە اۋە شابۋىلدارى مەن ارتيللەريالىق اتقىلاۋ توقتاتىلادى. ال قازىر الدىڭعى شەپ «اسكەرلەردى تولىق، كەزەڭ- كەزەڭىمەن شىعارۋ» ءۇشىن جاعداي جاسالعانعا دەيىن ساقتالادى.
قۇجاتتا ءتىرى جانە ولگەن تۇتقىندار يزرايلدىڭ رەسمي كەلىسىمىنەن كەيىن 72 ساعات ىشىندە قايتارىلادى دەپ جازىلعان. ونىڭ ورنىنا يزرايل 2023 -جىلعى 7-قازانداعى وقيعادان كەيىن ءومىر بويىنا باس بوستاندىعىنان ايىرىلعان 250 تۇتقىندى، سونداي- اق ايەلدەر مەن بالالاردى قوسقاندا 1700 پالەستينالىقتى بوساتادى.
وسى الماسۋدان كەيىن قارۋسىز جانە بەيبىت ءومىر سۇرۋگە كەلىسكەن پالەستينالىق حاماس قوزعالىسىنىڭ مۇشەلەرى راقىمشىلىققا يە بولادى. گازادان كەتكىسى كەلەتىندەرگە ولاردى قابىلداۋعا دايىن ەلدەرگە قاۋىپسىز ءوتۋ مۇمكىندىگى بەرىلەدى.
بۇدان بۇرىن ترامپ پەن نەتانياحۋ گازاداعى سوعىستى توقتاتۋ تۋرالى كەلىسىمگە كەلدى.
