اق ءۇي ترامپقا يمپيچمەنت جاريالاعان جاعدايدا كەرەك دەپ ستراتەگيا ازىرلەپ جاتىر

نيۋ-يورك. KAZINFORM - ا ق ش پرەزيدەنتى دونالد ترامپتىڭ كەڭەسشىلەرى كەلەسى جىلى وكىلدەر پالاتاسىندا دەموكراتتار كوپشىلىك ورىنعا يە بولسا، وعان قارسى تاعى دا يمپيچمەنت باستالۋى مۇمكىن دەگەن سسەناريدى بايىپپەن قاراستىرىپ وتىر،

 دەپ جازدى تاسس اگەنتتىگى.

پرەزيدەنتتىڭ كەڭەسشىلەرىنىڭ ءبىرى دجون ماكلافليننىڭ پىكىرىنشە، يمپيچمەنتتىڭ ىقتيمالدىعى - بۇل رەسپۋبليكالىق پارتيانىڭ وكىلدەر پالاتاسىنداعى مۇشەلەرىنە ترامپتىڭ ەكونوميكالىق پلاتفورماسىن، اسىرەسە 2017 -جىلعى سالىق جەڭىلدىكتەرىن ۇزارتۋ جوسپارىن قولداۋعا باعىتتالعان «دابىل بەلگىسى».

اقپارات كوزدەرىنە سۇيەنسەك، ەكى رەت يمپيچمەنت باستالعان العاشقى امەريكالىق كوشباسشى رەتىندە ترامپ پەن ونىڭ كومانداسى بۇل پروتسەستىڭ اق ءۇيدىڭ جۇمىسىنا جانە پرەزيدەنتتىڭ كۇن تارتىبىنە قانشالىقتى اسەر ەتۋى مۇمكىن ەكەنىن جاقسى تۇسىنەدى. تاعى ءبىر يمپيچمەنتتىڭ قاۋپى اكىمشىلىكتى 2026 -جىلعى ارالىق سايلاۋعا دەيىن جوسپارلانعان زاڭ جوبالارىن مۇمكىندىگىنشە تەزىرەك جۇزەگە اسىرۋعا ىنتالاندىرعان.

اق ءۇي كەڭەسشىسى دجون ماكلافليننىڭ پىكىرىنشە، يمپيچمەنت ىقتيمالدىعى - رەسپۋبليكالىق پارتيا مۇشەلەرىن ىشكى كەلىسپەۋشىلىكتەردى ءبىر جاققا قويىپ، ترامپتىڭ ەكونوميكالىق باعدارلاماسىن قولداۋعا يتەرمەلەۋ جولى.

دەموكراتتاردىڭ ارەكەتتەرى

ترامپقا يمپيچمەنت جاريالاۋ باستاماسىن ميچيگان شتاتىنان سايلانعان دەموكرات شري تانەدار كوتەردى. ءوزىنىڭ بەينەۇندەۋىندە ول پرەزيدەنتتى كونستيتۋتسيانى بۇزدى جانە بيلىكتى تارتىپ الۋعا تىرىستى دەپ ايىپتاپ، ارىپتەستەرىن بۇل باستامانى قولداۋعا شاقىردى.

ول جەتى ايىپ تاعىپ وتىر. زاڭ شىعارۋشىنىڭ پىكىرىنشە، ترامپ اتقارۋشى بيلىكتى اسىرا پايدالانىپ، ءادىل سوتقا كەدەرگى كەلتىرگەن، ەگەمەن ەلدەردى اسكەري باسقىنشىلىقپەن قورقىتىپ وتىر سونداي-اق سىنشىلار مەن بۇقارالىق اقپارات قۇرالدارىنا قارسى ارەكەت ەتە وتىرىپ، ءسوز بوستاندىعىنا قول سۇعادى. سونىمەن قاتار، تانەدار پرەزيدەنتتى تيرانيا، جەمقورلىق جانە «زاڭسىز ورگاندار» قۇردى دەپ جازعىرادى. ول، اتاپ ايتقاندا، ا ق ش ۇكىمەتىنىڭ جۇمىسىن جاقسارتۋ جونىندەگى دەپارتامەنت (DOGE) قۇرىپ، ونىڭ باسشىسى يلون ماسككە كونستيتۋتسيانى ءبىرجاقتى بۇزۋ قۇقىعىن بەرگەنىن مىسالعا الدى.

بۇعان دەيىن تەحاس شتاتىنان سايلانعان دەموكرات ەل گرين دە پرەزيدەنتكە يمپيچمەنت جاريالاۋ جوسپارىن مالىمدەگەن. ترامپتىڭ العاشقى پرەزيدەنتتىك مەرزىمى كەزىندە ول بىرنەشە رەت بيلىكتەن شەتتەتۋ تۋرالى ۇسىنىس ەنگىزگەن، ءبىراق ونىڭ ءبارى ءساتسىز اياقتالعان.

قازىرگى تاڭدا ترامپتى قولدايتىن رەسپۋبليكالىق پارتيا كونگرەسستەگى سەنات پەن وكىلدەر پالاتاسىندا كوپشىلىك ورىنعا يە، بۇل يمپيچمەنتتى بولدىرماۋى مۇمكىن.

ترامپ - ا ق ش تاريحىنداعى ەكى رەت يمپيچمەنت باستالعان العاشقى پرەزيدەنت. بۇل جاعدايلار ونىڭ العاشقى مەرزىمى كەزىندە - 2019 جانە 2021 -جىلدارى ورىن العان، ءبىراق ەكەۋى دە سەناتتا قابىلدانباعان.

يمپيچمەنت پروتسەدۋراسىنىڭ ەگجەي- تەگجەيى

ا ق ش كونستيتۋتسياسىنا سايكەس، يمپيچمەنت فەدەرالدىق قىزمەتكەرلەردى، سونىڭ ىشىندە پرەزيدەنتتى، وپاسىزدىق، پاراقورلىق نەمەسە وزگە دە اۋىر قىلمىستار مەن تەرىس ارەكەتتەر ءۇشىن قىزمەتتەن بوساتۋدى قاراستىرادى. ايىپتاۋ قۇقىعى تەك وكىلدەر پالاتاسىنا تيەسىلى.

كونگرەسس مۇشەلەرى بۇل ماسەلەنى پالاتانىڭ قۇقىقتىق كوميتەتىنە قاراۋعا جىبەرۋ تۋرالى داۋىس بەرۋدى ۇسىنا الادى. ەگەر ايىپتاۋلار نەگىزدى دەپ تانىلسا، رەسمي ايىپتاۋ قۇجاتى دايىندالادى.

ودان كەيىن بۇل قۇجات وكىلدەر پالاتاسىنىڭ تولىق قۇرامىندا داۋىسقا سالىنادى. قاراپايىم كوپشىلىك داۋىسپەن ماقۇلدانسا، ءىس سەناتقا جىبەرىلەدى. مۇندا پروتسەسس سوت وتىرىسىنا اينالادى جانە وعان ا ق ش جوعارعى سوتىنىڭ ءتوراعاسى جەتەكشىلىك ەتەدى. وكىلدەر پالاتاسى ايىپتاۋشى تاراپ رەتىندە ارەكەت ەتسە، سەناتورلار القابيلەر ءرولىن اتقارادى. يمپيچمەنتتى جۇزەگە اسىرۋ ءۇشىن سەناتورلاردىڭ ۇشتەن ەكىسىنىڭ داۋىسىن جيناۋ قاجەت.

بۇعان دەيىن حابارلانعانداي، Amnesty International بولسا ترامپتى ادام قۇقىقتارى سالاسىنداعى داعدارىسقا كىنالى دەپ جازعىرادى.