انتيكور ءبىلىم سالاسىندا جەمقورلىق فاكتىسى ءجيى تىركەلەتىن وڭىرلەردى اتادى

استانا. قازاقپارات - 2023-جىلدىڭ باسىنان بەرى ءبىلىم بەرۋ سالاسىندا جەمقورلىق فاكتىلەرى بويىنشا 287 قىلمىستىق ءىس تىركەلدى. ءبىلىم بەرۋ سالاسىنداعى جەمقورلىق بىلىقتار تۋرالى تولىعىراق سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ايتىپ بەردى.

«قارجى جىمقىرۋدىڭ ەڭ كوپ سوماسى جەتىسۋ، تۇركىستان، قىزىلوردا، الماتى، اقتوبە وبلىستارى مەن الماتى قالاسىندا انىقتالدى. جەمقورلىق قىلمىس جاساعان 386 ادام اشكەرەلەنىپ، ونىڭ ىشىندە 207 ادام سوتتالدى»، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.

سونداي-اق، انتيكوردىڭ رەسمي وكىلى قىزىلوردا وبلىسى جاڭاقورعان اۋدانى ءبىلىم ءبولىمىنىڭ بۇرىنعى باسشىسى مەن ونىڭ قاراماعىنداعىلارعا (باس بۋحگالتەر، باس ەكونوميست جانە 24 مەكتەپتىڭ بۋحگالتەرى) قاتىستى سوتقا دەيىنگى تەرگەۋ اياقتالعانىن ايتتى.

«ولار مەكتەپتەردە ءىس جۇزىندە ەڭبەك قىزمەتىن جۇزەگە اسىرماعان ادامدارعا جالاقى اۋدارۋ ارقىلى 213 ميلليون تەڭگە سوماسىندا بيۋجەت قاراجاتىن جىمقىرعان دەپ ايىپتالۋدا. بۇدان باسقا، ءبىلىم ءبولىمىنىڭ باس بۋحگالتەرى قىلمىستىق جولمەن الىنعان 6,5 ميلليون تەڭگە سوماسىنداعى اقشالاي قاراجاتتى زاڭداستىردى دەگەن كۇدىككە ءىلىندى. قازىرگى ۋاقىتتا قىلمىستىق ءىس سوتقا جىبەرىلدى»، - دەيدى ول.

ودان بولەك، بريفينگ بارىسىندا تاراز قالاسى پوليتەحنيكالىق كوللەدجىنىڭ ديرەكتورىنا قاتىستى سوتقا دەيىنگى تەرگەۋدىڭ اياقتالعانى بەلگىلى بولدى.

«كوللەدج ديرەكتورىنا «باعدارلامالىق قامتاماسىز ەتۋ» ماماندىعى بويىنشا تالاپكەرگە جالپى ءبىلىم بەرۋ گرانتىن بەرۋگە كومەكتەسكەنى ءۇشىن پارا الدى دەگەن ايىپ تاعىلدى. قىلمىستىق ءىس ماتەريالدارى سوتقا جولداندى»، - دەپ تولىقتىردى سپيكەر.

ەسكە سالا كەتسەك، وتكەن جىلى دا ءبىلىم سالاسىندا جەمقورلىق فاكتىلەرىنىڭ كوپتىگى ايتىلعان ەدى.

وسىعان بايلانىستى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي مەن وقۋ-اعارتۋ ءمينيسترى عاني بەيسەمبايەۆ ورتا ءبىلىم بەرۋدى قارجىلاندىرۋداعى سىبايلاس جەمقورلىق قاتەرلەرىنە بىرلەسكەن تالداۋ جۇرگىزۋگە ۋاعدالاستى.