انتاركتيكادا بۇرىن بەيمالىم بولىپ كەلگەن ارال تابىلدى
استانا. KAZINFORM - انتاركتيكاداعى ۋەددەلل تەڭىزىندە جۇرگىزىلگەن ەكسپەديتسيا بارىسىندا بۇرىن عىلىمي ورتاعا بەلگىسىز بولىپ كەلگەن ارال انىقتالدى، دەپ حابارلايدى Armenpress.
نەمىستىڭ Polarstern مۇزجارعىش كەمەسىنىڭ بورتىنداعى حالىقارالىق زەرتتەۋشىلەر توبى بۇل جاڭالىقتى كۇتپەگەن جەردەن بايقاعان. بۇل تۋرالى الفرەد ۆەگەنەر اتىنداعى پوليارلىق جانە تەڭىز زەرتتەۋلەرى ينستيتۋتى مالىمدەگەن.
ينستيتۋتتىڭ مالىمەتىنشە، 2026 -جىلعى 8 -اقپاننان بەرى 93 ادامنان تۇراتىن حالىقارالىق ەكسپەديتسيا ۋەددەلل تەڭىزىنىڭ سولتۇستىك- باتىس بولىگىن زەرتتەپ كەلەدى.
عالىمدار مەن كەمە ەكيپاجى تەڭىز كارتالارىندا تەك قاۋىپتى ايماق رەتىندە بەلگىلەنگەن اۋماقتا ارالدىڭ كەنەتتەن پايدا بولعانىن كورىپ، تاڭعالعان.
زەرتتەۋ ناتيجەسىندە جارتاس قۇرىلىمدى ارالدىڭ ۇزىندىعى شامامەن 130 مەتر، ەنى 50 مەتر، بيىكتىگى 16 مەتر ەكەنى انىقتالعان.
مامانداردىڭ ايتۋىنشا، ارال وسى ۋاقىتقا دەيىن سپۋتنيكتىك سۋرەتتەردە مۇز جامىلعىسىنىڭ اسەرىنەن ايسبەرگپەن شاتاستىرىلىپ كەلگەن بولۋى مۇمكىن.
قازىرگى ۋاقىتتا ارالعا اتاۋ بەرۋ ءراسىمىن باستاۋ ماسەلەسى قاراستىرىلىپ جاتىر.
وسىعان دەيىن قۇس جولىنىڭ قاق ورتاسىنان بەلگىسىز عالامشار تابىلعانى تۋرالى جازدىق.
