انتاركتيدادان پيراميدالار تابىلعانى راس پا؟

تانىمال Telegram-ارنالارىنىڭ بىرىندە انتاركتيداداعى ادام قولىمەن جاسالعان پيراميدالاردىڭ ىشىنە كىرىپ-شىققان عالىمنىڭ اڭگىمەسى جاريالاندى.

قۇرىلىمدار مىسىرلىق نىساندارعا ۇقسايدى جانە ىشىندە ارتەفاكتى كوپ. بايانداماشىنىڭ ايتۋىنشا، بۇل اقپارات بۇرىن قۇپيا بولعان. ءبىراق ۆيدەودا كەلتىرىلگەن بارلىق دەرەك جالعان، - دەپ حابارلايدى stopfake.kz.

باستاپقى سۋرەتتە كورەرمەنگە بۇل ادامنىڭ كىم ەكەنى جانە ۆيدەونىڭ قايدان الىنعانى تۇسىندىرىلەدى. كادرداعى قارت ادام - ماسساچۋسەتس ۋنيۆەرسيتەتىنىڭ پروفەسسورى گابريەل دج. تەيلور. 1975-جىلدارى ول انتاركتيدانى زەرتتەپ، پيراميدالاردىڭ ىشىندە بولعان ەكەن. ول قايتىس بولعاننان كەيىن سول ەكسپەديتسيالاردان قۇجاتتار، ارتەفاكتىلەر، فوتوسۋرەتتەر مەن كينوماتەريالدار قالعان. مۇراگەرلەر ءبارىن اۋكسيونعا شىعارعان. لوتقا جارناما رەتىندە ءۇش ساعاتتىق جازبادان 20 مينۋتتىق ۆيدەو جاسالعان. كونسپيرولوگتاردىڭ ايتۋىنشا، تەيلوردىڭ بۇكىل مۇراسىن امەريكالىق ارنايى قىزمەتتەر ساتىپ العان. تەك ينتەرنەتتە تاراعان روليك قالعان.

شىن مانىندە، بۇل ادام تۋرالى جەلىدە ەشقانداي اقپارات جوق. ادام ءسوزىنىڭ ورنىنا كوبىنەسە ەستىلمەي قالاتىن مەحانيكالىق داۋىس ەستىلەدى. سونىمەن قاتار، پروفەسسوردىڭ اڭگىمەسىن ورىس تىلىندە دىبىستاعان اۋدارماشى الدىن الا دايىندالعان ءماتىندى وقىعانداي توقتاماي سويلەيدى.

اڭگىمە بارىسىندا ينتەرنەتتە كوپشىلىككە قولجەتىمدى بەيبەرەكەت سۋرەتتەر مەن ۆيدەو ۇزىندىلەر كورسەتىلەدى. فانتاستيكالىق قالالاردىڭ سۋرەتتەرى دە، مىسىرلىق پەرعاۋىنداردىڭ قارىنداشپەن سالىنعان ەسكيزدەرى دە، قار باسقان اۋماقتاردىڭ بۇلىڭعىر فوتولارى دا بار.

پيراميداعا ۇقساس تاۋ بەينەلەنگەن فوتوسۋرەتكە توقتالايىق. ونىڭ بارى تۋرالى 2013-جىلى Alien Disclosure Group («وزگەعالامشارلىقتار تۋرالى اقپاراتتى اشۋ توبى») مۇشەلەرى حابارلادى. ولار جارتاستىڭ سۋرەتىن تاراتىپ، ونى ادامدار سالعان دەپ ايتا باستادى. توپ مۇشەلەرىنىڭ ءبىرى ستيۆەن حاننارد جالعان ۆيدەولار جاريالاعانى ءۇشىن بىرنەشە رەت ۇستالعانىن ايتا كەتكەن ءجون.

الەمنىڭ تۇكپىر-تۇكپىرىندەگى عالىمدار Alien Disclosure Group مالىمدەمەسىن جوققا شىعارادى. انتاركتيداداعى پيراميدا - بۇل ءپىشىنى ەرەكشە تاۋ. ول ۆينسون سىلەمىندە ورنالاسقان. بۇل ءۇستىرتتىڭ سۋرەتتەرىن الپينيستەر 2010-جىلى تۇسىرگەن. بۇگىندە تاۋلاردى Google Maps كارتاسىنان كورۋگە بولادى.

كاليفورنيا ۋنيۆەرسيتەتىنىڭ جەر جۇيەسى عىلىمدارىنىڭ پروفەسسورى ەريك رينو دا پيراميدا تابيعي تۇردە قالىپتاسقان دەپ سانايدى. ۇستىرتتەردىڭ كوبى پيراميداعا ۇقسايدى، ءبىراق ولاردىڭ ءتورت قىرلى بولۋى سيرەك كەزدەسەدى، ادەتتە ءبىر نەمەسە ەكى قىرى عانا بولادى.

فەيك ۆيدەودا رەسمي اتاۋى جوق، ءبىراق انتاركتيداداعى ەلسۋورت تاۋ جوتاسىنا كىرەتىن جارتاستىڭ دا سۋرەتى بار. بۇل تاۋلاردى 1935-جىلى قاراشادا امەريكالىق ۇشقىش لينكولن ەلسۋورت اشقان. ا ق ش گەولوگيالىق قىزمەتىنىڭ 2007-جىلعى ەسەبىندە پيراميدا ءتارىزدى تاۋ جوتالارى تۋرالى ايتىلعان.

نەلىكتەن تاۋلار پيراميداعا ۇقسايدى؟ مۇنداي جارتاستاردىڭ ۇزىندىعى 400 شاقىرىمنان اسادى، ال مۇزدىق شىڭدارى تاستان تۇرادى. ەگەر وسىنداي بيىكتىككە جوعارىدان قاراسا، وندا كوز الدىڭدا پيراميدا تۇرعانداي بولادى. عالىمدار مۇنداي جارتاستاردى بۇرىننان «پيراميدالىق شىڭى بار تاۋلار» دەپ اتايدى.

گەولوگتاردىڭ پىكىرىنشە، وسىنداي جۇمباق ءپىشىن عاسىرلار بويى تاۋلاردىڭ ەروزياعا ۇشىراۋىنا بايلانىستى قالىپتاسادى. قار ەرىگەن كەزدە تاۋ جارىقتارى سۋعا تولادى. مۇز قاتقان كەزدە ولار سونىڭ ەسەبىنەن ۇلعايادى. پروتسەسس ۇزدىكسىز، سوندىقتان ۇلكەن جارىقتار پايدا بولعان كەزدە تاۋدىڭ ءبىر بولىگى جاي قۇلاپ كەتەدى.

انتاركتيداداعى پيراميدالار تۋرالى جيىرما مينۋتتىق ۆيدەو - ينتەرنەتتەن الىنعان سۋرەتتەر جيىنتىعى، سونداي-اق داۋىسى ءبىرتۇرلى بەلگىسىز ادام ءوز پىكىرىن ايتادى. وڭتۇستىك پوليۋستە قولدان جاسالعان پيراميدالار بارىنا ناقتى جانە سەنىمدى دالەلدەر جوق.