انتاركتيدا سۋلارىن العاش ءجۇزىپ وتكەن قازاق قىزى تۋرالى نە بىلەمىز

ورال. KAZINFORM - باتىس قازاقستان وبلىسىندا تۋىپ- وسكەن انەل سىتدىقوۆا ءوز ومىرىندەگى تاعى ءبىر بيىكتى باعىندىردى.

انەل سىتدىقوۆا بۇل جولى 12- قاراشادا انتاركتيدانىڭ مۇزداي سۋلارىن ءجۇزىپ وتۋگە قاتىستى. ول 750 مەتر قاشىقتىقتى 18.58.95 مينۋتتا ءجۇزىپ ءوتتى. سۋدىڭ تەمپەراتۋراسى -1,4 گرادۋستى كورسەتكەن.

ءوزىنىڭ ايتۋىنشا، درەيك بۇعازى ارقىلى ەكى كۇنگە ۇلاسقان جۇزۋدەن كەيىن انتاركتيداعا 10-قاراشا كۇنى كەلگەن.

«iISA (International Ice Swimming Association, حالىقارالىق قىسقى ءجۇزۋ قاۋىمداستىعى) ۇيىمداستىرۋشىسى ءارى نەگىزىن سالۋشى رام باركاي باسشىلىق ەتكەن ءبىزدىڭ توپقا وڭتۇستىك افريكا رەسپۋبليكاسى، ا ق ش، فرانسيا، ۇلىبريتانيا، ماجارستان، مالايزيا، اۋستراليا جانە قازاقستاننان 13 ءجۇزۋشى جانە ءبىر دوكتور كىردى. ارامىزدا Ice Seven, Lynton Mortensen, Oceans Seven تيتۋلدارىن يەلەنگەن الەمدەگى ءۇش ادامنىڭ ءبىرى Kate Steels (كەيت ستيل) سياقتى اتاقتى ءجۇزۋ شەبەرلەرى بولدى»، - دەيدى انەل سىتدىقوۆا.

Фото, видео: Әнел Сытдықованың жеке мұрағатынан

ونىڭ ايتۋىنشا، انتاركتيدادا بولعان ون كۇننىڭ ىشىندە ءجۇزۋ ءۇشىن قولايلى ءساتتى كۇتكەن. ونىڭ ۇستىنە كەمەدە باسقا 150 جولاۋشى بولعاندىقتان، كورابل ءتارتىبىن دە ساقتاۋ كەرەك ەدى.

«دەگەنمەن ءبىز انتاركتيدانىڭ سۋلارىن ءجۇزىپ وتتىك. مەن ءۇشىن بۇل وتە سالقىن بولدى. سۋدىڭ سالقىندىعى -1,4 گرادۋس بولسا، جەلدىڭ جىلدامدىعى ساعاتىنا 35 شاقىرىم ەدى. ايسبەرگتەر مەن پينگۆيندەر اراسىندا ءجۇزۋدىڭ اسەرى بولەك. انتاركتيدا مۇزداي قۇشاعىن اشقان از عانا ادامنىڭ قاتارىندا بولۋ مەن ءۇشىن ەرەكشە وقيعا بولدى»، - دەيدى ءا. سىتدىقوۆا.

انەل سىتدىقوۆا - ترياتلوننان قازاقستاننىڭ تۇڭعىش تەمىر حانشايىمى، ءبىرىنشى ايرونمەن (Ironman) جانە ۋلترامەن (Ultraman) .

قازاق قىزى بۇدان بەس جىل بۇرىن قازاقستاندىقتاردان العاش رەت ايگىلى لا- مانش بۇعازىن (38 كم) گيدروكوستيۋمسىز ءجۇزىپ وتكەن ەدى.

انەل 2022 -جىلى جازدا ا ق ش- تا مانحەتتەن ارالى اينالاسىندا 20 كوپىردى اينالىپ، 48,5 كم قاشىقتىقتى باعىندىردى. سودان كەيىن لوس- اندجەلەستە الەمدەگى ەڭ ۇزاق مارافوندىق قاشىقتىقتاردىڭ ءبىرى - كاتالينا بۇعازىن (34 شاقىرىمعا جۋىق) توقتاماستان ءجۇزىپ ءوتتى.

لا- مانش (34 ك م) جانە مانحەتتەن اينالىسىنداعى 20 كوپىردى (48 ك م) قوسقاندا، كاتالينا الەمدەگى اشىق سۋدا جۇزۋدەن ۇشتىك ءتاجدىڭ (Triple Crown of Open Water) قۇرامىنا ەنەدى.

Фото, видео: Әнел Сытдықованың жеке мұрағатынан

سوندىقتان انەلگە «ءۇش ءتاجدىڭ حانشايىمى» اتاعى بەرىلىپ، ول «ۇشتىك ءتاج» (Triple Crown) كلۋبىنا مۇشە بولىپ قابىلداندى. ت م د كولەمىندە ەشكىم مۇنداي جەتىستىككە جەتكەن ەمەس. 

ءا. سىتدىقوۆا ءوزىنىڭ وتباسىمەن انگليادا، لوندون ماڭىندا تۇرىپ جاتىر.

ەسكە سالا كەتەيىك، بۇدان بۇرىن ورالدىق كەلىنشەكتىڭ ايگىلى لا- مانش بۇعازىن ءجۇزىپ وتكەنىن جازعان بولاتىنبىز.

سونداي- اق انەل سىتدىقوۆا ا ق ش- تاعى ەكى ۇزاق قاشىقتىقتى ءجۇزىپ وتكىسى كەلەتىنىن ايتقان بولاتىن.