انتاليا شەتەلدىك تۋريست قابىلداۋدا تاريحي رەكورد جاسادى - شەتەلدەگى قازاق باسپا ءسوزى
KAZINFORM ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
انتاليا شەتەلدىك تۋريست قابىلداۋدا تاريحي رەكورد جاسادى - «TRT»
انتاليا وتكەن جىلى 15 ميلليون 689258 شەتەلدىك تۋريستى قابىلداپ، تاريحتىڭ رەكوردىن جاڭارتتى. الەمنىڭ تارتىمدى تۋريستىك ورتالىقتارىنىڭ ءبىرى سانالاتىن قالا 2023-جىلى تۋريزمدەگى ەڭ جاقسى جىلدى باستان وتكەردى، دەپ حابارلادى تۇركيا راديو تەليەۆيزيا پورتالى.
تۇركيالىق ب ا ق-تىڭ دەرەگىنشە، قالاداعى الدىڭعى رەكورد 2019-جىلى 15280763 شەتەلدىك تۋريستپەن جاڭارعان بولاتىن.
وبلىستىق مادەنيەت جانە تۋريزم باسقارماسىنىڭ مالىمەتىنە قاراعاندا، 2023 -جىلدىڭ 1-قاڭتارى مەن 31-جەلتوقسانى ارالىعىندا قالاعا 15689258 شەتەلدىك تۋريست كەلگەن.
ايتا كەتەيىك، وتكەن جىلى انتاليا رەسەيدەن كەلگەن 3 ميلليون 461 مىڭ 762 تۋريستتى قابىلداعان.
قازاقستاندىق ستۋدەنتتەرگە قىتاي ەلى 155 وقۋ گرانتىن ۇسىنىپ جاتىر - «حالىق گازەتى»
قىتاي ۇكىمەتى باكالاۆريات، ماگيستراتۋرا، دوكتورانتۋرا باعدارلامالارى بويىنشا قازاقستانعا 155 وقۋ گرانتىن ۇسىنىپ وتىر. بۇل تۋرالى قىتايلىق «حالىق گازەتى» باسىلىمى قازاقستاندىق «BAQ.KZ»-كە سىلتەمە جاساپ حابارلايدى.
كەلتىرگەن دەرەكتەرگە سۇيەنسەك، «حالىقارالىق باعدارلامالار ورتالىعىنىڭ» مالىمەتىنشە، قازاقستان رەسپۋبليكاسىنىڭ ءبىلىم جانە عىلىم مينيسترلىگى مەن قىتاي حالىق رەسپۋبليكاسىنىڭ ءبىلىم مينيسترلىگى اراسىنداعى 2003-جىلعى 3-ماۋسىمداعى ءبىلىم بەرۋ سالاسىنداعى ىنتىماقتاستىق تۋرالى كەلىسىمگە سايكەس قىتاي ۇكىمەتى 2024-2025 وقۋ جىلىنا ق ح ر مەملەكەتتىك ستيپەندياسى بويىنشا وقۋعا باكالاۆريات، ماگيستراتۋرا، دوكتورانتۋرا باعدارلامالارىمەن 155 ءبىلىم گرانتىن ۇسىنادى.
ايتا كەتەيىك، وقۋدا جۇرگەن ۇمىتكەرلەر مەكتەپتەن (كوللەدجدەن، جوعارى وقۋ ورنىنان) ءبىتىرۋشىنىڭ مارتەبەسى تۋرالى وقۋ ءبىتىرۋدىڭ جوسپارلانعان كۇنىن كورسەتە وتىرىپ، وقۋ بولىمىمەن راستالعان، قىتاي نەمەسە اعىلشىن تىلدەرىنە اۋدارماسى بار نوتاريالدى كۋالاندىرىلعان انىقتامانى ۇسىنۋى قاجەت.
اقپارات سوڭىندا قىتاي ەلىنەن بارىپ وقۋعا ۇمىتكەرلەگە قويىلاتىن تالاپتار مەن گرانت قانداي شىعىنداردى وتەيتىنى تۋرالى ايتىلعان.
وزبەكستان مەن قازاقستاندى بايلانىستىراتىن كەدەن بەكەتى كەڭەيتىلمەك - «ءو ز ا»
وزبەكستان مەن قازاقستاندى بايلانىستىراتىن تاشكەنت وبلىسىنداعى «عيشتكۋپريك» (جىبەك جولى) وتكىزۋ كەدەن بەكەتى كەڭەيتىلمەك، دەپ حابارلايدى «ءو ز ا» اقپارات اگەنتتىگى.
اتالعان باسىلىمنىڭ دەرەگىنشە، تاشكەنت اۋدانى، «عيشتكۋپريك» اگروفيرماسىنىڭ ماسسيۆىنىڭ كونتۋرىندا ورنالاسقان مەملەكەتتىك رەزەرۆتەگى پايدالانىلماي جاتقان 1,81 گەكتار اۋىل شارۋاشىلىعى جەرى «عيشتكۋپريك» شەكارا بەكەتىن كەڭەيتۋ جانە جوبالىق قۇجاتتار نەگىزىندە قوسىمشا عيماراتتار مەن قۇرىلىستاردى سالۋ ءۇشىن بولىنگەن. بۇل تۋرالى ءتيىستى شەشىمگە تاشكەنت وبلىسىنىڭ اكىمى زوير ميرزايەۆ قول قويعان.
سونىمەن قاتار قاۋلىدا اتالعان اۋماقتا ورنالاسقان ينجەنەرلىك جەلىلەردى جىلجىتۋ نەمەسە ەرەكشە قورعالاتىن اۋماقتى ساقتاۋ جۇمىستارىن جۇرگىزۋ تۋرالى شەشىم قابىلدانعان.
سونداي-اق، وسى اپتادا «ءو ز ا»-دا «وزبەكستاندا جۇرگىزۋشى كۋالىگىمەن اۋە رەيسىندە ۇشۋعا رۇقسات ەتىلمەك» دەگەن تاقىرىپتاعى اقپارات جاريالاندى.
وزبەكستاندىق ب ا ق-تىڭ مالىمەتىنشە، Uzbekistan Airports قۇزىرىنداعى اۋەجايلاردىڭ قىزمەتى رەسپۋبليكانىڭ كولىك سالاسىنا قاتىستى قۇجاتتارمەن، ونىڭ ىشىندە وزگەرتۋلەر جانە تولىقتىرۋلارمەن رەتتەلگەن.
مينيسترلەر كابينەتىنىڭ 2017 -جىلعى 19-ماۋسىمداعى «ىشكى ىستەر ورگاندارى جۇيەسىندە مەملەكەتتىك قىزمەت كورسەتۋ ساپاسىن ودان ءارى ارتتىرۋ جانە راسىمدەردى وڭايلاتۋ جونىندەگى شارالار تۋرالى» 389 ساندى قاۋلىسىنا سايكەس جاڭا ۇلتتىق جۇرگىزۋشى كۋالىگى ازاماتتىڭ جەكە باسىن راستايتىن رەسمي مەملەكەتتىك قۇجات مارتەبەسىنە يە.
«وسى مالىمەتتەرگە سايكەس، اۋەجايدا ازاماتتىڭ جەكە باسىن كۋالاندىراتىن قۇجات رەتىندە تانىلاتىن جانە جولاۋشىلارعا ولاردى پايدالانا وتىرىپ، ىشكى رەيستەرگە تىركەلۋ قۇقىعىن بەرەتىن قۇجاتتاردىڭ (جۇرگىزۋشى كۋالىگى، تۋۋ تۋرالى كۋالىگى، اسكەري بيلەت جانە ت. ب.) تۇپكىلىكتى تىزبەسى پىسىقتالۋدا»، دەلىنگەن Uzbekistan Airports حابارىندا.
قىتايلىق ازاماتتار ۆيزاسىز بارا الاتىن ەلدەر ءتىزىمى جاريالاندى - CNR
قىتايمەن ءوزارا ۆيزاسىز قاتىناۋعا رۇقسات ەتىلگەن 20 دان استان ەلدىڭ ءتىزىمى جاريالاندى.
بۇل تۋرالى وسى اپتادا قىتايدىڭ «ورتالىق حالىق راديوسىندا» حابارلاندى. ولار مىنالار: تايلاند، سينگاپۋر، مالديۆ، قازاقستان، انتيگۋا جانە باربۋدا، البانيا، بىرىككەن اراب امىرلىكتەرى، باربادوس، باگامى، بەلارۋس، بوسنيا جانە گەرتسەگوۆينا، دومينيكا، ەكۆادور، فيدجي، گرەنادا، كاتار، ماۆريكي، سەربيا، سەيشەل، سان-مارينو، سۋرينام، تونگا، ارمەنيا قاتارلى ەلدەر.
يران مەن قازاقستان اراسىندا تۋريزم سالاسىن كەڭەيتۋ كەرەك - «Parstoday»
قازاقستانداعى يران ەلشىسى ءالي اكبار دجوۋكار قازاقستاننىڭ تۋريزم جانە سپورت ۆيتسە-ءمينيسترى ەرجان ەركىنبايەۆپەن كەزدەسىپ، تۋريزم سالاسىندا ىنتىماقتاستىقتى كەڭەيتۋ كەرەگىن باسا ايتتى، دەپ حابارلايدى «Parstoday» اقپارات اگەنتتىگى.
يراندىق ب ا ق-تىڭ كەلتىرگەن مالىمەتتەرىنە سۇيەنسەك، ءالي اكبار دجوۋكار ەرجان ەركىنبايەۆپەن كەزدەسۋىندە ەكىجاقتى قارىم-قاتىناستا تۋريزمنىڭ ماڭىزىنا توقتالعان. ونىڭ ايتۋىنشا، قازىرگى جاعدايدا ەكى ەل اراسىنداعى تۋريستەر سانى وسى سالاداعى شىنايى الەۋەتتەرگە ساي ەمەس. سوندىقتان «يران مەن قازاقستاننىڭ تۋريستىك الەۋەتتەرىن ەسكەرە وتىرىپ، تۋريستەر سانىن ارتتىرۋ ءۇشىن ءتيىستى ورگاندار كوبىرەك تالپىنىس جاساۋى كەرەك»، - دەيدى ءالي اكبار دجوۋكار.
يران ەلشىسى تۋريزم سالاسىنداعى قازىرگى جاعدايدى ەكى ەلدىڭ مۇددەسىنە ساي وزگەرتۋ ءۇشىن جاڭا باستامالار مەن يدەيالار ايتىپ، قازاقستان باسشىلارىن جاقىن بولاشاقتا يراندا تۋريزم سالاسىندا وتەتىن شارالارعا بەلسەندى قاتىسۋعا شاقىرامىز دەگەن.
ەرجان ەركىنبايەۆ تا ەكى ەلدىڭ تۋريستىك قاتىناسىن دامىتۋعا بار كۇشىن سالاتىنىن ايتقان.
گۋلانيۋي ارالىندا 1,5 عاسىردىڭ كۋاسى بولعان ەسكى عيماراتتار بار - «حالىق گازەتى»
قىتايدىڭ فۋجيان ولكەسى شيامەن قالاسىندا ورنالاسقان گۋلانيۋي ارالى (اعىلشىن تىلىندە Kulangsu) ءتورت مەزگىلى كوكتەمدەي جايما شۋاق بولىپ تۇراتىن «تەڭىزدەگى ساياباق» قانا ەمەس، سونىمەن قاتار ءوزىنىڭ كوپتەگەن تاريحي عيماراتتارىنا بايلانىستى «ساۋلەت مۇراجايى» دەگەن تاماشا اتىمەن ەل ءىشى سىرتىنان كەلەتىن تۋريستەردى باۋرايدى، دەپ جازادى قىتايلىق «kaz.people.cn».
اتالعان ب ا ق-تىڭ مالىمەتىنشە، شيامەندەگى گۋلانيۋي ارالىنىڭ تاريحى ونىڭ ەرەكشە مادەني لاندشافتىن جاسادى. 1844 -جىلدان باستاپ 13 ەل گۋلانيۋي ارالىندا كونسۋلدىقتار اشتى، ال ۇلى بريتانيا، امەريكا قۇراما شتاتتارى، فرانسيا جانە باسقا ەلدەر دە وسىندا شىركەۋلەر سالدى، مەكتەپتەر، اۋرۋحانالار، شەتەلدىك بانكتەر اشتى.
وسىلايشا، گۋلانيۋي ارالىندا باتىستىق ستيلدەگى قوعامدىق عيماراتتار مەن حالىق قولدانىسىنداعى عيماراتتار ساقتالىپ قالدى. ارالدا 19-عاسىردىڭ اياعىنان 20-عاسىردىڭ ءبىرىنشى جارتىسىنا دەيىن سالىنعان بارلىق تۇردەگى 1000 نان استام عيمارات بار. بۇل شىعىس جانە باتىس ساۋلەت مادەنيەتىنىڭ وكىلدەرى توعىسقان ورتا.
ايتا كەتەيىك، 2017 -جىلى «گۋلانيۋي ارالى: حالىقارالىق تاريحي قاۋىمداستىعى» دۇنيەجۇزىلىك مۇرا تىزىمىنە ەنگىزىلگەن ەكەن.
اۆتور
بەيسەن سۇلتان ۇلى
