انكارا اكىمى ىستامبۇلداعى ميتينگتە يماموعلۋعا قولداۋ كورسەتتى
استانا. KAZINFORM - وپپوزيتسيالىق كوزقاراسىمەن تانىمال انكارا اكىمى مانسۋر ياۆاش ىستامبۇلداعى ميتينگىلەرگە نارازىلىق بىلدىرۋشىلەرگە قولداۋ كورسەتۋ ماقساتىندا قوسىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يماموعلۋ قاماۋعا الىنعاننان كەيىن بىردەن باستالعان نارازىلىقتار تۇركيانىڭ باسقا قالالارىنا دا جىلدام تارادى. العاشقى كۇندەردەن باستاپ وپپوزيتسيالىق «رەسپۋبليكالىق حالىقتىق پارتيا» (ر ح پ) ءتوراعاسى وزگۇر وزەل شەرۋلەرگە بەلسەندى قاتىسىپ كەلەدى. سونىمەن قاتار، انكارا اكىمى ياۆاش تا ر ح پ يدەيالارىن قولدايتىنىن راستادى.
ءوزىنىڭ بۇكىل ساياسي مانسابىندا رەفورمالار مەن ادام قۇقىقتارىن قورعاۋدىڭ جاقتاۋشىسى رەتىندە تانىلعان ياۆاش نارازىلىقتارعا قاتىسۋ قازىرگى تۇركياداعى ساياسي جاعدايدا ماڭىزدى بەلگى ەكەنىن مالىمدەدى. ول دەموكراتيالىق قۇندىلىقتاردى، ازاماتتاردىڭ ءوز پىكىرىن ءبىلدىرۋ جانە بەيبىت نارازىلىقتارعا قاتىسۋ قۇقىعىن قولدايتىنىن ەرەكشە اتاپ ءوتتى.
بيلىك تاراپىنان 23- ناۋرىزعا دەيىن ەنگىزىلگەن شەكتەۋلەرگە قاراماستان، ىستامبۇلداعى شەرۋلەر مەن اكسيالار جالعاسۋدا. 20-نان 21-ناۋرىزعا قاراعان ءتۇنى تۇركيانىڭ بىرنەشە قالاسىندا قايتادان نارازىلىقتار ءوتتى. ىستامبۇلدا قالا اكىمدىگىنىڭ عيماراتى ماڭىنا كوپتەگەن ادامدار جينالدى.
انكارا اكىمى الەۋمەتتىك جەلىدە ءوزىنىڭ ىستامبۇلداعى تاريحي ساراچحانە اۋدانىندا، نارازىلىق اكسيالارى ءوتىپ جاتقان قالا اكىمدىگى الدىندا تۇرعانىن حابارلادى. بۇل شەرۋلەر قاماۋعا الىنعان ىستامبۇل مەرى ەكرەم يماموعلۋعا قولداۋ كورسەتۋ ماقساتىندا ۇيىمداستىرىلعان.
بۇعان دەيىن ارىپتەسىن قولدايتىنىن بىلدىرگەن مانسۋر ياۆاش ىستامبۇلعا بارا جاتقانىن، سونداي-اق ر ح پ- نىڭ پارلامەنتتىك توبى مەن دەموكراتيا ءۇشىن كۇرەسىپ جاتقان بارلىق مەرلەر مەن پارتيا مۇشەلەرىن قولدايتىنىن مالىمدەگەن بولاتىن.
ءوزىنىڭ جازباسىندا ول قاماۋعا الىنعان يماموعلۋدى «ءبىزدىڭ پرەزيدەنتىمىز» دەپ اتاپ، وسىلايشا وپپوزيتسيا كوشباسشىسىنا ادالدىعى مەن قولداۋىن ايقىن كورسەتتى.
ىستامبۇل مەرى ەكرەم يماموعلۋ 19-ناۋرىز كۇنى جەمقورلىق جانە پاراقورلىقپەن اينالىسقان قىلمىستىق توپتى ۇيىمداستىردى دەگەن ايىپپەن قاماۋعا الىندى. مەملەكەتتىك ايىپتاۋ تاراپى ونىڭ جانە سەرىكتەستەرىنىڭ جوعارى دەڭگەيدەگى سىبايلاس جەمقورلىق سحەمالارىنا قاتىسى بولۋى مۇمكىن ەكەنىن العا تارتادى. ءتورت كۇنگە سوزىلاتىن تەرگەۋ بارىسىندا قالا باسشىسى مەن ونىڭ جاقتاستارى قاماۋدا بولادى.
بۇعان دەيىن تۇركيا پرەزيدەنتى رەجەپ تايىپ ەردوعان وپپوزيتسيانى سىناپ، ولاردى قۇقىق قورعاۋ ورگاندارى مەن سوت جۇيەسىنە ساياسي قىسىم كورسەتۋگە تىرىستى دەپ ايىپتاعان بولاتىن.
ەردوعاننىڭ ايتۋىنشا، وپپوزيتسيانىڭ ىشكى جانجالدارى مەن زاڭعا قاتىستى ماسەلەلەرىن تۇركياداعى ەڭ باستى پروبلەما رەتىندە كورسەتۋ ارەكەتتەرى - ەكىجۇزدىلىكتىڭ شارىقتاۋ شەگى.
اۆتور
نازىم بولەسوۆا
