انكارا 2026 -جىلى تۇركى الەمىنىڭ تۋريزم استاناسى بولادى
استانا. KAZINFORM - انكارا تۇركى الەمىنىڭ 2026 -جىلعى تۋريستىك استاناسى بولىپ تاڭدالدى. بۇل تۋرالى تۇركيانىڭ مادەنيەت جانە تۋريزم ءمينيسترى مەحمەت نۋري ەرسوي مالىمدەدى.

ءتيىستى شەشىم تۇركى مەملەكەتتەرى ۇيىمىنىڭ (ت م ۇ) تۋريزم مينيسترلەرىنىڭ 10-وتىرىسىندا قابىلداندى. ۇيىمعا ءازىربايجان، قازاقستان، قىرعىزستان، تۇركيا جانە وزبەكستان كىرەدى. تۇركىمەنستان مەن ۆەنگريا باقىلاۋشى مارتەبەسىنە يە.
- انكارا باي مۇرالارى، مۇراجايلارى، مادەني ورىندارى جانە مادەني ارتۇرلىلىگىمەن تۇركى الەمىنىڭ ورتاق جادىن كورسەتەتىن سيرەك قالالاردىڭ ءبىرى، - دەدى ول.
ونىڭ ايتۋىنشا، انادولى جەرىنىڭ قاق ورتاسىندا ورنالاسقان بۇل كونە استانا ەندى تۇركيانىڭ عانا ەمەس، بۇكىل تۇركى الەمىنىڭ مادەني جانە تۋريستىك كورمەسىنە اينالادى.
- ءبىز 2026 -جىلى انكارانى بىرگە اشا تۇسەمىز جانە استانامىزدىڭ قۇندىلىقتارىن باۋىرلاس حالىقتارمەن بىرىكتىرۋدى جالعاستىرامىز، - دەدى ەرسوي.
بيىل تۇركى الەمىنىڭ تۋريستىك استاناسى قىرعىزستانداعى جالال-اباد قالاسى بولدى.
ەسكە سالا كەتەيىك، تۇركى مەملەكەتتەرى ۇيىمىنىڭ بەيرەسمي سامميتىندە ءبىرقاتار قۇجات قابىلدانعانى جايلى جازعان ەدىك.