اندجەلينا دجولي 1958 -جىلعى قىمبات كولىگىن اۋكسيونعا قويادى
استانا. Kazinform - امەريكالىق اكتريسا اندجەلينا دجولي قاراشا ايىندا 1958 -جىلى شىعارىلعان Ferrari 250 GT كولىگىن اۋكسيونعا قويادى. بۇل تۋرالى «Christie's» اۋكسيون ءۇيى حابارلادى.
بۇل كولىك Ferrari كومپانياسى شىعارعان 353 دانانىڭ ون ءبىرىنشى كولىگى ەكەنى اتاپ ءوتىلدى. كولىكتە 3 ليترلىك Colombo V12 قوزعالتقىشى بار جانە بەس جىلدامدىقتى مەحانيكالىق قوراپپەن جابدىقتالعان. كولىكتىڭ سىرتى قارا تۇسپەن بەزەندىرىلگەن، ال ىشكى جاعى اشىق قىزىل بىلعارىمەن قاپتالعان. Ferrari بار بولعانى 10000 شاقىرىم جۇرگەن.
250 GT سۋپەركار العاش رەت 1958 -جىلى پاريج اۆتوسالونىندا كورسەتىلدى. ول ءتۇپنۇسقاداعى Borrani دوڭگەلەكتەرىمەن جانە اليۋميني بارابان تەجەگىشتەرىمەن جابدىقتالعان.
Christie's اۆتوكولىكتىڭ باستاپقى قوزعالتقىشى ورناتىلعانىن راستادى، ءبىراق ول 1978 -جىلى كوك جانە اق تۇسكە بويالعان، ينتەرەر قارادان قىزىلعا وزگەرگەن. اۋكسيون ءۇيى اكتريسانىڭ كولىكتى قانشا ۋاقىت يەلەنگەنىن نەمەسە ونى مۇلدەم پايدالانباعانىن ايتۋدان باس تارتتى.
سونداي-اق، دجوليدىڭ كولىكتى نە ءۇشىن ساتىپ جاتقانى بەلگىسىز. جۇلدىزدىڭ بۇل فەرراريدى ايداپ ءجۇرىپ تۇسكەن سۋرەتى جوق. اكتريسا ءجاي عانا قاجەتسىز زاتتاردان قۇتىلۋدا دەگەن بولجام بار.
ادەتتە مۇنداي سيرەك كولىكتەر شامامەن 0,5 ميلليون دوللارعا ساتىلادى. Christie's اۋكسيون ءۇيى كولىكتى 660 مىڭنان 880 مىڭ دوللارعا دەيىن باعالاۋدا.
