امەريكاندىق 20 شتات ترامپ اكىمشىلىگىن سوتقا بەردى

استانا. KAZINFORM - كوبىنە دەموكراتتار جەتەكشىلىك ەتەتىن 20 شتات يمميگراتسيالىق قىزمەت تالاپتارى مەن قارجىلاندىرۋدى قىسقارتامىز دەپ قورقىتقانى ءۇشىن ترامپ اكىمشىلىگىنە قارسى سوتقا شاعىم ءتۇسىردى، دەپ حابارلايدى The New York Times.

شتاتتىڭ باس پروكۋرورلارى ەكى سوتقا شاعىم ءتۇسىردى - ءبىرى توتەنشە جاعدايلاردى باسقارۋ فەدەرالدى اگەنتتىگى مەن ىشكى قاۋىپسىزدىك مينيسترلىگىنە، ەكىنشىسى كولىك دەپارتامەنتىنە قارسى.

شتاتتار اتاپ وتكەندەي، تاسىمالداۋ، لاڭكەستىككە قارسى كۇرەس جانە توتەنشە جاعدايلارعا ازىرلىككە ارنالعان فەدەرالدى قاراجاتتى قىسقارتۋ قاۋىپتى جانە «زاڭسىز». ولاردىڭ پايىمداۋىنشا، اكىمشىلىك كونگرەستىڭ شىعىندار جونىندەگى وكىلەتتىگىن زاڭسىز تارتىپ الىپ، شتاتتاردى دونالد ترامپتىڭ ساياساتىن قابىلداۋعا ماجبۇرلەۋ ءۇشىن ءامياننىڭ كۇشىن پايدالانىپ وتىر.

سوتقا شاعىم تۇسىرۋگە باستاماشى بولعاندار - كاليفورنيا، يللينويس، نيۋ- دجەرسي، رود-ايلەند جانە مەريلەند شتاتتارى. ولارعا كولورادو، كوننەكتيكۋت، دەلاۆەر، گاۆاي، مەن، ماسساچۋسەتس، ميچيگان، ميننەسوتا، نيەۆادا، نيۋ- مەكسيكو، نيۋ- يورك، ورەگون، ۆەرمونت، ۆاشينگتون جانە ۆيسكونسين قوسىلدى.

بارلىق شتاتتا (نيەۆادا مەن ۆەرمونتتا عانا رەسپۋبليكاشىلدار) باس پروكۋرورلار مەن گۋبەرناتورلار - دەموكراتتار. سوت پروتسەسىن جۇرگىزىپ جاتقان كاليفورنيانىڭ باس پروكۋرورى روب بونتا مالىمدەمەسىندە پرەزيدەنت ترامپ ومىرلىك ماڭىزدى قارجىلاندىرۋدى «ۇساق تيىن» رەتىندە قاراستىرىپ جاتقانىن قوسىپ ءوتتى.

وتكەن ايدا اق ءۇي يمميگراتسيالىق بيلىكپەن تولىق ىنتىماقتاسپايىنشا، پانالاۋ يۋريسديكسيالارىن قارجىلاندىرۋدى توقتاتامىز دەپ قورقىتقان ەكى بۇيرىق تۋرالى جاريالادى.

- ەگەر دەموكراتيالىق باس پروكۋرورلار ساياسي ويىندارمەن اينالىسپاي، قىلمىسكەرلەردى قۋدالاۋعا جانە ترامپ اكىمشىلىگىمەن بىرگە ءوز قاۋىمدارىنداعى زاڭسىز يمميگرانت- گانگستەرلەر ماسەلەسىن شەشۋگە نازار اۋدارسا، امەريكاندىقتار ءۇشىن جاقسى بولار ەدى، - دەدى اق ءۇي وكىلى كۋش دەساي شاعىمدار تۋرالى سۇراققا جاۋاپ بەرە وتىرىپ.

بۇعان دەيىن ا ق ش- تا 12 شتات ترامپتى باج سالىعىنا بايلانىستى سوتقا بەرگەنىن جازعان بولاتىنبىز.

اۆتور

زارينا تۋعانبايەۆا