«امەريكالىقتاردىڭ ارمانىنا» جەتۋ قانشا تۇرادى؟
استانا. قازاقپارات - «امەريكالىقتاردىڭ ارمانى» دەگەنىمىز - ا ق ش-تا كەڭ تاراعان ۇعىم، ول ءار ادامنىڭ الەۋمەتتىك نەمەسە ەكونوميكالىق مارتەبەسىنە قاراماستان، تاباندى ەڭبەك، باستاماشىلدىق جانە كۇش-جىگەر ارقىلى تابىسقا جەتۋگە جانە جاقسى ءومىر سۇرۋگە مۇمكىندىك بار دەگەن سەنىمگە نەگىزدەلگەن.
بۇل ارمان ءار ادام ءۇشىن ءارتۇرلى مانگە يە بولۋى مۇمكىن، ءبىراق جالپى العاندا، بۇل ۇعىمنىڭ اياسىنا كوبىنەسە مىنا اسپەكتىلەر قامتىلادى:
1. ماتەريالدىق جەتىستىك: قارجىلىق تۇراقتىلىققا قول جەتكىزۋ، جەكە ءۇي ساتىپ الۋ، جاقسى جۇمىس تابۋ جانە لايىقتى تابىسقا يە بولۋ.
2. وتباسى جانە بالا تاربيەسى: بۇل «امەريكالىقتاردىڭ ارمانىنىڭ» نەگىزگى وزەگى - وتباسى قۇرۋ جانە بالالاردى باعىپ- قاعۋعا قاجەت بار جاعدايدى جاساۋ، ولارعا ساپالى ءبىلىم مەن مۇمكىندىكتەر بەرۋ.
3. جەكە شەكارا، ەركىندىك جانە ءوزىن-ءوزى دامىتۋ: ەركىندىك پەن تەڭ قۇقىقتى پايدالانىپ، جەكە ماقسات پەن ارماندارعا قول جەتكىزۋ. بۇل كاسىپ اشۋ، ءبىلىم الۋ، جاڭا مۇمكىندىكتەردى پايدالانۋ سياقتى اسپەكتىلەردى قامتيدى.
4. الەۋمەتتىك موبيلدىلىك: تومەنگى الەۋمەتتىك نەمەسە ەكونوميكالىق مارتەبەدە دۇنيەگە كەلگەن ادام دا، ەگەر ەڭبەكقور بولسا، ءبىلىم الىپ، جاقسى جۇمىس ىستەسە، قوعامنىڭ جوعارى قاباتىنا كوتەرىلە الادى دەگەن تۇسىنىك.
«امەريكالىق ارمان» يدەياسى تاريحي تۇرعىدان ا ق ش-تىڭ باستى تارتىمدى ۇعىمدارىنىڭ ءبىرى سانالادى، بۇل ەلگە يمميگرانتتار اعىنىن تارتتى جانە قانشاما جىل بويى امەريكاندىقتاردىڭ باستى قۇندىلىعى بولدى. الايدا، قازىر ءومىر ءسۇرۋ قۇنىنىڭ ءوسۋى، بايلىق تەڭسىزدىگى جانە الەۋمەتتىك قۇرىلىمدىق ماسەلەلەر بۇل ارمانعا قول جەتكىزۋدى كۇردەلەندىرۋدە.
«امەريكالىقتاردىڭ ارمانىنا» جەتۋ قانشا تۇرادى؟
«امەريكالىقتاردىڭ ارمانىنا» جەتۋدىڭ ىقتيمال قۇنى قازىر - 4,4 ميلليون دوللار. بۇل سوما وتباسىلاردىڭ ومىرىندەگى نەگىزگى بەلەستەردى، سونىڭ ىشىندە ۇيلەنۋ، ەكى بالانى تاربيەلەۋ، ءۇي ساتىپ الۋ، جاڭا كولىك الۋ، زەينەتكە جيناق جيناۋ، جىل سايىنعى دەمالىس جانە باسقا دا شىعىنداردى قامتيدى.
Investopedia ەسەبىندە «امەريكالىقتاردىڭ ارمانىنا» قول جەتكىزۋ ءۇشىن قانشا اقشا قاجەت ەكەنى تالدانعان. بۇل سوما كوپتەگەن امەريكالىقتاردىڭ ءومىر بويى تاپقان تابىسىنان 1 ميلليون دوللارعا ارتىق، دەگەنمەن ەكى تابىس كوزىنەن پايدا تاباتىن وتباسىلار ءۇشىن بۇل قولجەتىمدى بولۋى مۇمكىن.
دجوردجتاۋن ۋنيۆەرسيتەتىنىڭ ءبىلىم بەرۋ جانە ەڭبەك رەسۋرستارى ورتالىعىنىڭ ا ق ش حالىق ساناعى بيۋروسى دەرەكتەرىنە سۇيەنە وتىرىپ جۇرگىزگەن تالداۋى بويىنشا، ا ق ش-تاعى باكالاۆر دارەجەسى بار ادامدار ءومىر بويى ورتاشا ەسەپپەن شامامەن 2,8 ميلليون دوللار تابىس تابادى. ايەلدەر ورتا ەسەپپەن 2,4 ميلليون دوللار تابادى، ال ەرلەر - 3,3 ميلليون دوللار.
ەگەر ءۇي شارۋاشىلىعىن قاراستىراتىن بولساق، ەكى باكالاۆر دارەجەسى بار امەريكالىق وتباسىنىڭ ءومىر بويعى تابىسى ورتاشا ەسەپپەن 5,6 ميلليون دوللاردى قۇرايدى.
بۇل سالىستىرۋ قولايلىراق كورىنۋى مۇمكىن، ءبىراق 4,4 ميلليون دوللار تەك «امەريكالىق ارمانمەن» بايلانىستى اسپەكتىلەردىڭ قۇنىن كورسەتەدى، ال ءومىر ءسۇرۋ قۇنىنىڭ باسقا ماڭىزدى شىعىندارىن ەسكەرۋ قاجەت. ولاردىڭ قاتارىنا ازىق- تۇلىك، دەنساۋلىق ساقتاۋ، اۆتوكولىك ساقتاندىرۋى جانە باسقا دا نەگىزگى قاجەتتىلىكتەر كىرەدى، ولار Investopedia ەسەبىنە كىرمەگەن.
سونىمەن قاتار، ناسىلدىك بايلىق تەڭسىزدىگى، گەندەرلىك ەڭبەكاقى ايىرماشىلىعى جانە ءومىر ءسۇرۋ قۇنىنىڭ ءوسۋى كوپتەگەن ادامدار ءۇشىن «امەريكالىقتاردىڭ ارمانىن» قولجەتىمسىز ەتەدى.
دەگەنمەن، «امەريكالىقتاردىڭ ارمانى» ۇعىمى ءار ادام ءۇشىن ءار ءتۇرلى مانگە يە. ءبىزدىڭ تالداۋىمىز وسى ارمانمەن بايلانىستى كەيبىر اسپەكتىلەردىڭ قۇنىن قامتيدى جانە قازىرگى تاڭدا امەريكاندىقتار ءۇشىن ولاردىڭ شىعىستارىنىڭ ناقتى بەينەسىن كورسەتەدى. بۇل بارلىق ومىرلىك شىعىنداردى تولىق قامتىمايدى جانە ءار ادامنىڭ جەكە تاڭداۋىنا بايلانىستى بولۋى مۇمكىن، - دەپ ەسكەرتەدى زەرتتەۋ اۆتورلارى.
