امەريكاداعى قازاق جىگىتى تابىسى تۋرالى ايتتى
قازىر امەريكادا تۇراتىن ەربول مولداجان تاپقان تابىسى تۋرالى اشىپ ايتىپ بەردى، - دەپ حابارلايدى Massaget.kz.
ەربول مولداجان ا ق ش-تا تراك(جۇك كولىگى - رەد.) ايداپ، اقشا تاپقان.
«امەريكادا جالاقى ءبىر اي ەمەس، ءار اپتا سايىن بەرەدى. تراك ايداۋشى بولىپ جۇمىس ىستەۋدىڭ 3 ءتۇرى بار: كومپانياعا جۇرگىزۋشى بولىپ جالداناسىڭ، تراكتى جالعا الىپ ءوزىڭ جۇمىس ىستەيسىڭ، تراكتى ساتىپ الىپ، يەسى بولاسىڭ. ءبىز تراكتى جالعا الدىق. ەندى قيساپقا كوشەيىك. الدىمەن جۇكتى 900 دوللارعا Dallas-تان San-Antonio-عا جەتكىزدىك. سوسىن 2500 دوللارعا San-Antonio-دان Glendale-عا جۇك الدىق. ال Phoenix-تان Plainfeild-قا 9100 دوللارعا شىققان تاسىمال ناعىز مايشەلپەكتىڭ ءوزى دەرسىڭ. وكىنىشكە قاراي، بۇل اپتادا جوسپارلى ەكى جۇك جەتكىزىلمەيتىن بولدى. ونداي كەزدە 175 دوللاردان كوميسسيا تولەنەدى. سوعان قاراماستان، جالپى 6 كۇندە 4 جۇكپەن 12960 دوللار گروسس جاپتىق. گروسس - جالپى كىرگەن تابىس»، - دەيدى ول.
قازىرگى باعاممەن 12960 دوللار تەڭگەگە شاققاندا 6792448 تەڭگە. ەربول مولداجان شىعىنداردى ەسەپتەپ، قالتادا قانشا قالاتىنىن ايتتى.
«ونىڭ 12 پايىزىن جۇكتى تاپقان كومپانياعا ۇستاتتىق. جاپ-جاڭا تراكتى جالعا العانىمىز ءۇشىن 1298 دوللار، ال جانارمايعا 1935 دوللار تولەدىك. وزگە دە ۇساق شىعىنداردى قوسساق، جالپى شىعىن 3754 دوللار بولدى. تازا قالعانى - 7560 دوللار، ونى ەكىگە بولەمىز، سوندا ءارقايسىمىزعا 3850 دوللار، تەڭگەگە اينالدىرساق 2 ميلليوننان اسادى. ءبىراق ونى 4-كە كوبەيتىپ، ايىنا 8 ميلليون تابادى دەپ اسىقپاڭىز. ويتكەنى ءاردايىم ولاي بولا بەرمەيدى»، - دەيدى امەريكاداعى قازاق جىگىت.
