امەريكادا ەكىنشى ادامعا شوشقانىڭ جۇرەگى سالىندى

مەريلەند ۋنيۆەرسيتەتىندە ەكىنشى رەت ادامعا گەنەتيكالىق تۇرلەندىرىلگەن شوشقا جۇرەگى سالىندى. بۇعان دەيىنگى ناۋقاس مۇنداي جۇرەكپەن ەكى اي ءومىر سۇرگەن، دەپ حابارلايدى قازاقپارات اگەنتتىگى DW باسىلىمىنا سىلتەمە جاساپ.

ا ق ش- تاعى مەريلەند ۋنيۆەرسيتەتى، مەديتسينا ورتالىعىنىڭ ماماندارى تاريحتا ەكىنشى رەت ادامعا گەنەتيكالىق تۇرلەندىرىلگەن شوشقانىڭ جۇرەگىن ءساتتى ورنالاستىردى. امەريكالىق اتك ارداگەرى، 58 جاستاعى ناۋقاس وتادان كەيىن ءوزىن جاقسى سەزىنەدى، قوسىمشا قۇرىلعىلارسىز دەم الادى. ال وعان ورنالاستىرىلعان جۇرەك «سىرتقى قۇرىلعىلاردىڭ كومەگىنسىز، قالىپتى جۇمىس ىستەپ تۇر»، - دەلىنگەن 22 -قىركۇيەكتە ۋنيۆەرسيتەت سايتىنا سالىنعان اقپاراتتا.

فوسەتتە بۇعان دەيىن جۇرەك- قان تامىر اۋرۋى مەن ىشكى قان كەتۋ بولعاندىقتان ادامنىڭ دونور جۇرەگىن قابىلداۋعا قابىلەتسىز دەپ تانىلدى.

«سوڭعى ءۇمىتىم - شوشقا جۇرەگى. قالاي بولعاندا دا، ەندى مۇمكىندىگىم بار»، - دەدى ول وتا الدىندا.

فوسەتت اعزاسى دونور مۇشەنى قابىلداماي قويماس ءۇشىن ارنايى پرەپاراتتار مەن انتيدەنە ءىشىپ جاتىر.

بۇعان دەيىن وسىنداي وتا ءدال وسى مەديتسينا ورتالىعىندا 2022 -جىلى جاسالعان. 57 جاستاعى ناۋقاس دەۆيد بەننەتت «كوپتەگەن فاكتور، ونىڭ ىشىندە دەنساۋلىعىنىڭ ناشارلىعىنا» بايلانىستى ەكى ايدان كەيىن قايتىس بولدى، دەپ مالىمدەدى مەديتسينا قىزمەتكەرلەرى.

قازىر ا ق ش- تىڭ وزىندە گەنەتيكالىق تۇرلەندىرىلگەن جانۋارلاردىڭ اعزاسىن وزىنە قوندىرۋعا 100 مىڭنان استام ادام كەزەكتە تۇر. ماماندار وسى ارقىلى دونورلىق مۇشە جەتىسپەۋ ماسەلەسىن شەشۋدى كوزدەيدى. بۇعان دەيىن نيۋ- يورك ۋنيۆەرسيتەتى جانىنداعى لانگون مەديتسينا ورتالىعىندا ميى ولگەن ادامعا شوشقا بۇيرەگى سالىندى. ول ادام اعزاسىندا 61 كۇن جۇمىس ىستەدى.

اۆتور

بالنۇر قوجاگەلدى