امەريكا ەلشىسى بىلامىق ءپىسىرىپ، تارى شاي دەمدەپ ۇيرەندى

استانا. KAZINFORM - امەريكا قۇراما شتاتتارىنىڭ قازاقستانداعى ەلشىسى دەنيەل روزەنبليۋم ناۋرىز مەرەكەسىنە وراي بىلامىق ءپىسىرىپ ۇيرەندى.

ەلىشىلىكتىڭ تاراتقان اقپاراتىنا سەنەك، ەلشى روزەنبليۋم مەن ونىڭ جۇبايى شەرون قازاق ەتنوگرافى ايگەرىم مۇساعاجينوۆادان ناۋرىز مەيرامىنىڭ رەتسەپتەرىن ۇيرەنىپ، مەرەكەنىڭ رۋحىن سەزىنىپ جاتىر.

ولار اۋەلى بىلامىق ءپىسىرىپ كوردى. ءداستۇرلى تۇردە جاس بوسانعان انالارعا، ناۋقاستارعا نەمەسە قارتتارعا ۇسىنىلاتىن بۇل بوتقا بيدايدان نەمەسە تارى ۇنىنان جاسالادى.

اۋەلى بيداي نەمەسە تارىنى تۇشىتىلعان مال مايىمەن قىزارعانشا قۋىرىپ الادى، سودان كەيىن سيىر سۇتىنە قايناتىپ، وعان قانت پەن تۇز قوسادى.

ولار سونداي-اق تارى شاي دەمدەدى.

بۇل شايدىڭ ەرەكشەلىگى - ونىڭ ادامنىڭ اس قورىتۋ جۇيەسىنە تيگىزەتىن ۇلكەن پايداسىندا جاتىر، ويتكەنى ول قولدان ۇشىرىلعان تارىدان جاسالعان.