امەريكا ءۇشىن ماڭىزدى كۇن: ترامپ ءتۇرلى ەلدەرمەن ساۋدا كەلىسىمىنە قول قويدى

استانا. KAZINFORM – ا ق ش بىرنەشە ەلمەن ساۋدا كەلىسىمىنە قول قويدى، سونداي-اق دونالد ترامپتىڭ 1 -تامىزعا بەلگىلەنگەن باج سالىعىن ەنگىزۋ مەرزىمى الدىندا ءۇندىستان مەن برازيلياعا باج سالىعىن ەنگىزدى، دەپ حابارلايدى Kazinform ءتىلشىسى.

- 1 -تامىزعا بەلگىلەنگەن مەرزىم وزگەرىسسىز جانە ۇزارتىلمايدى. امەريكا ءۇشىن ماڭىزدى كۇن!، - دەپ جازدى ول Truth Social-دا.

وڭتۇستىك كورەيا ا ق ش ەكونوميكاسىنا 350 ميلليارد دوللار ينۆەستيتسيا قۇيىپ، امەريكالىق كومپانيالاردان 100 ميلليارد دوللار سوماسىنا ەنەرگيا رەسۋرستارىن ساتىپ الادى. بۇل ەكى ەل اراسىنداعى ساۋدا كەلىسىمىنىڭ ناتيجەسى. دونالد ترامپ بۇل جاڭالىقپەن Truth Social الەۋمەتتىك جەلىسىندەگى پاراقشاسىندا ءبولىستى.

- وڭتۇستىك كورەيا ءۇشىن %15 كەدەندىك باجى تۋرالى كەلىستىك. امەريكاعا باج سالىنبايدى. سونداي- اق وڭتۇستىك كورەيانىڭ قۇراما شتاتتارمەن ساۋدا جاساۋعا تولىق اشىق بولۋى جانە ولار امەريكالىق ونىمدەردى، سونىڭ ىشىندە جەڭىل، جۇك كولىكتەرى، اۋىلشارۋاشىلىق تەحنيكالارىن جانە ت. ب. قابىلدايتىنى تۋرالى كەلىسىلدى، - دەپ جازدى ترامپ.

بۇدان باسقا، اق ءۇي باسشىسىنىڭ ايتۋىنشا، سەۋل دە قوماقتى ينۆەستيتسيا بولۋگە كەلىستى، ونىڭ كولەمىن تاراپتار ەكى اپتا ىشىندە وڭتۇستىك كورەيا پرەزيدەنتى لي چجە ميەن ۆاشينگتونعا كەلگەن كەزدە جاريالايدى.

تايلاند جانە كامبودجا

سونداي-اق ا ق ش- تىڭ كامبودجا جانە تايلاندپەن ساۋدا كەلىسىمدەرىن جاساسقانى تۋرالى بەلگىلى بولدى.

مامىلەنىڭ ەگجەي-تەگجەيى ءالى كەلتىرىلگەن جوق.

تايلاند پەن كامبودجا اراسىنداعى بەيبىت كەلىسىمگە قول قويىلعان سوڭ ا ق ش پرەزيدەنتى ءوزىنىڭ دەلدالدىق ارەكەتتەرى ەكى ەل اراسىنداعى قارۋلى قاقتىعىس كەزىندە «ميلليونداعان ادامنىڭ» ولىمىنە جول بەرمەگەنىن حابارلادى.

گونكونگتىڭ South China Morning Post گازەتىنىڭ جازۋىنشا، ترامپ ساۋدا كەلىسسوزىن ەكى ەلدى كەلىسسوز ۇستەلىنە وتىرعىزۋ ءۇشىن «شوقپار» رەتىندە پايدالانىپ، ۆاشينگتون شايقاستار جالعاسىپ جاتقاندا ەكى ەلمەن دە ساۋدا كەلىسىمىنە قول جەتكىزە المايدى دەپ قورقىتقان.

پاكىستان

ا ق ش سونداي-اق پاكىستانمەن ەل اۋماعىندا ءىرى مۇناي كەن ورىندارىن بىرلەسىپ يگەرۋدى قامتيتىن ساۋدا كەلىسىمىنە قول قويدى.

- ءبىز جاڭا عانا پاكىستانمەن كەلىسىم جاسادىق، وعان سايكەس ا ق ش پەن پاكىستان بۇل ەلدىڭ وراسان زور مۇناي قورىن بىرلەسىپ يگەرەدى. قازىر بۇل سەرىكتەستىككە جەتەكشىلىك ەتەتىن مۇناي كومپانياسىن تاڭداپ جاتىرمىز. كىم بىلەدى، ءبىر كۇنى ولار ءۇندىستانعا مۇناي ساتاتىن شىعار، - دەپ جازدى اق ءۇي باسشىسى Truth Social-داعى پاراقشاسىندا.

ءۇندىستانعا قارسى باج

ءبىر كۇن بۇرىن دونالد ترامپ ءۇندىستانعا 1 -تامىزدان باستاپ %25 كولەمىندە باج سالىعىن ەنگىزەتىنىن مالىمدەدى.

— ءۇندىستان ءبىزدىڭ دوسىمىز بولسا دا، ءبىز ولارمەن كوپ جىلدار بويى سالىستىرمالى تۇردە از بيزنەس جۇرگىزدىك، ويتكەنى ولاردىڭ تاريفتەرى تىم جوعارى، الەمدەگى ەڭ جوعارىنىڭ ءبىرى جانە ولار كەز كەلگەن ەلدىڭ ەڭ اۋىر جانە جيىركەنىشتى مونەتارلىق ەمەس ساۋدا كەدەرگىلەرىنە يە»، - دەپ جازدى دونالد ترامپ Truth الەۋمەتتىك جەلىسىندە.

ا ق ش ساۋدا وكىلى دجەيميسون گرير دۇيسەنبىدە CNBC- كە ۇندىستانمەن قيىن ساۋدا كەلىسىمىنە قول جەتكىزۋ ءۇشىن ەكى ەل اراسىندا كوبىرەك كەلىسسوز جۇرگىزۋ قاجەت ەكەنىن مالىمدەدى.

برازيليادا قارسى باج

دونالد ترامپ برازيليادان كەلەتىن تاۋارلار مەن قىزمەتتەرگە باج سالىعىن 50 پايىزعا دەيىن ارتتىراتىن جارلىققا قول قويدى.

بۇعان دەيىن 10 پايىزدىق مولشەرلەمە كۇشىندە بولاتىن.

- برازيليادان ا ق ش-تىڭ كەدەندىك اۋماعىنا اكەلىنەتىن تاۋارلارعا زاڭعا سايكەس %40 قوسىمشا ادۆالورلىق باج سالىعى سالىنادى، - دەلىنگەن جارلىقتا.

باج سالىعىن ارتتىرۋ ترامپتى بەلسەندى قولداعان برازيليانىڭ بۇرىنعى پرەزيدەنتى جاير بولسونارۋعا قاتىستى جالعاسىپ جاتقان سوتقا بايلانىستى جۇزەگە اسىرىلىپ جاتىر. ۆاشينگتوننىڭ نۇسقاسى بويىنشا، سوت پروتسەسى «ادام قۇقىقتارىن بۇزاتىن» «ساياسي استارلى» قادام.

بولسونارۋ 2023 -جىلدىڭ قاڭتارىندا برازيليا استاناسىندا تارتىپسىزدىكتەردى تۋدىرۋعا كومەكتەستى دەگەن كۇدىككە ءىلىندى.

برازيليا پرەزيدەنتى لۋلا دا سيلۆا برازيليالىق تاۋارلارعا باج سالىعىن ەنگىزۋ قۇراما شتاتتار ەكونوميكاسىنىڭ وزىنە كەرى اسەر ەتۋى مۇمكىن ەكەنىن ەسكەرتتى.

برازيليا پارلامەنتى فەدەرالدىق سەناتىنىڭ مۇشەسى كارلۋس ۆيانا ا ق ش-تىڭ برازيليالىق يمپورتقا تاريفتەرى بريكس قاۋىمداستىعىنىڭ كۇشەيۋىنەن قورقۋمەن بايلانىستى بولعاسىن بولسونارۋدى قولداۋ سىلتاۋ ەكەنىن مالىمدەدى.

ەسكە سالا كەتسەك، ا ق ش پرەزيدەنتى دونالد ترامپ برازيليادان كەلەتىن تاۋارلار مەن قىزمەتتەرگە سالىناتىن كەدەندىك باج سالىعىن 50 پايىزعا دەيىن ارتتىرۋدى كوزدەيتىن جارلىققا قول قويدى.

بۇعان دەيىن دونالد ترامپ ا ق ش 1-تامىزعا بەلگىلەنگەن 14-تەن استام ەلگە كەدەندىك باج سالىعىن ەنگىزۋدى كەيىنگە قالدىرمايتىنىن ەسكەرتكەن.

اۆتور

زارينا تۋعانبايەۆا