امانجول ءالتاي «قالادان - اۋىلعا» اتتى باعدارلامانى قولعا الۋدى ۇسىندى

استانا. KAZINFORM - ءماجىلىس دەپۋتاتى امانجول ءالتاي جاستاردى اۋىلدا تۇراقتاندىرۋ ءۇشىن «قالادان - اۋىلعا» اتتى باعدارلامانى قولعا الۋدى ۇسىندى.

- «قالادان - اۋىلعا» دەگەن باعدارلاما كەرەك بىزگە. جاستاردى قالادان اۋىل تارتۋ ءۇشىن نە ىستەۋ كەرەك؟ وسىنىڭ ءبىر ستراتەگيالىق ۇزاق مەرزىمدى جوسپارىن جاساۋىمىز قاجەت. ارينە، جاستار بارۋ ءۇشىن ەڭ ءبىرىنشى باسپانا ماسەلەسىن شەشۋ كەرەك. قازىر اۋىلداعى كوپبالالى انالار سەكىلدى ارنايى ساناتتاردى مەملەكەت ەسەبىنەن باسپانامەن قامتۋ تاجىريبەسى بار. ول دۇرىس. ەندى بىزگە اۋىلعا كوشىپ بارعان نەمەسە اۋىلداعى جاس مامانداردى باسپانامەن قامتۋدىڭ جولدارىن قاراعان دۇرىس، - دەدى دەپۋتات ماجىلىستەگى دوڭگەلەك ۇستەلدە.

امانجول ءالتاي اۋىلدارداعى مەديتسينالىق مەكەمەلەردى تەحنيكامەن جابدىقتاۋ ماسەلەسىندە الالاۋ بار ەكەنىن اتاپ ءوتتى.

- اۋىلدى كەمسىتۋ بار بىزدە. وعان بىرنەشە دالەل ايتۋعا بولادى. مىسالى، دەنساۋلىق ساقتاۋ سالاسىندا «جەدەل جاردەم» كولىكتەرى ءبىرىنشى وبلىسقا بولىنەدى. وبلىستان ءسال ەسكىرگەندەرىن اۋداندارعا بەرەدى. اۋداندار ابدەن جۇرۋگە جاراماي قالعان، اناۋ كەڭەس زامانىنداعى، «مەتاللولوم» بولىپ قالعان كولىكتەردى كوزالداۋ قىلىپ اۋىلدارعا بەرەدى. قاي اۋىلعا بارساڭىز دا، دارىگەرلەر ناۋقاستى اۋدان ورتالىعىنا جەتكىزە الماي جانتالاسىپ جۇرگەنىن كورەسىزدەر، - دەدى ءماجىلىس دەپۋتاتى.

ۇلتتىق ەكونوميكا مينيسترلىگىنىڭ دەرەگى بويىنشا، كەيىنگى ون جىلدا قازاقستان كارتاسىنان 572 اۋىل جويىلعان.

اۆتور

ەسىمجان ناقتىباي