ماجىلىستەگى «Amanat» پارتيا فراكسياسىنىڭ الدا اتقاراتىن جۇمىستارى ايقىندالدى
وندا ساياسي ۇيىمنىڭ 2022-جىلعى 1- ناۋرىزدا وتكەن كەزەكتەن تىس 22-سەزىندە ەل پرەزيدەنتى، پارتيا ءتوراعاسى ق. ك. توقايەۆ العا قويعان جاڭا مىندەتتەردى جۇزەگە اسىرۋ ماسەلەلەرى قارالدى.
ەرلان قوشانوۆ سەزدىڭ تاريحي مانىنە توقتالىپ، «Amanat» پارتياسى قىزمەتىن ترانسفورماتسيالاۋ اياسىندا دەپۋتاتتاردىڭ جۇمىسىن جانداندىرۋدىڭ ماڭىزىن اتاپ ءوتتى. نەگىزگى ماقسات - قوعام سۇرانىسىنا دەر كەزىندە جاۋاپ بەرۋ جانە ازاماتتاردىڭ ناقتى ماسەلەلەرىن شەشۋ.
ناتيجەسىندە ول جاڭا ساياسي جاعدايدا سايلاۋشىلاردىڭ «Amanat» پارتياسىنا دەگەن سەنىمىن ارتتىرۋعا سەپتىگىن تيگىزەدى. دەپۋتاتتار جۇمىسىنداعى جاڭا تاسىلدەردى تالقىلاي كەلە، ءماجىلىس سپيكەرى حالىقتىڭ ناقتى پروبلەمالارىن شەشۋ ءۇشىن ۇكىمەتپەن بىرلەسە جۇمىس اتقارۋدىڭ ماڭىزدىلىعىن ايتتى.
دەپۋتاتتارعا بۇل ىسكە ۇكىمەتتەن ءبىر ۆيتسە- پرەمەردىڭ بەكىتىلگەنى جونىندە اقپارات بەرىلدى. ول دەپۋتاتتاردىڭ ساۋالدارىندا كوتەرىلگەن ماسەلەلەردى شەشۋ بويىنشا جۇيەلى تۇردە جۇمىس ىستەيتىن بولادى.
«مەملەكەت باسشىسى ازاماتتاردىڭ مۇددەسىن قورعاۋ باستى ماقسات ەكەنىن ناقتى ايتتى. ءبىز وڭىرلەردە قوزعالعان ءبىرقاتار وزەكتى ماسەلەلەردى توپتاستىردىق. مەن ونى فراكسيا پرەزيديۋمىنا ءبىر جۇيەگە كەلتىرىپ، ۇكىمەتكە جولداۋدى تاپسىردىم. ودان كەيىن ۇكىمەتپەن بىرلەسكەن ءىس- شارالار وتكىزىپ، سول ماسەلەلەردى شەشۋ ءۇشىن ءارقايسىسىن جەكە-جەكە تالقىلايمىز. بۇل ب ا ق وكىلدەرىنىڭ قاتىسۋىمەن اشىق وتەتىن بولادى»، - دەدى ەرلان قوشانوۆ.
سونىمەن قاتار فراكسيا باسشىسى دەپۋتاتتاردى حالىقتى تولعاندىراتىن ماسەلەلەر بويىنشا سايلاۋشىلارمەن كەرى بايلانىس ورناتۋ ءۇشىن الەۋمەتتىك جەلىلەر مەن بۇقارالىق اقپارات قۇرالدارىنىڭ مۇمكىندىكتەرىن بەلسەندى پايدالانۋعا شاقىردى. اسىرەسە، جۇمىس بارىسىندا الەۋمەتتىك زەرتتەۋلەردى كەڭىنەن پايدالانۋ، اسا ماڭىزدى الەۋمەتتىك-ەكونوميكالىق ماسەلەلەر، سونىڭ ىشىندە ازاماتتاردىڭ شاعىمدارى بويىنشا وزەكتى ستاتيستيكالىق دەرەكتەردى الۋ ءۇشىن ۇكىمەتتىڭ سيفرلىق كەڭسەسىمەن ءوزارا ءىس-قيمىلدى كۇشەيتۋ، پارتيانىڭ سايلاۋالدى ۋادەلەرىن ورىنداۋ ءۇشىن جول كارتاسىنىڭ ىسكە اسىرىلۋىن دەپۋتاتتىق باقىلاۋعا الۋ.
سونداي-اق فراكسيا وتىرىسىندا دەپۋتاتتار وڭىرلەردەگى حالىقتىڭ ناقتى ماسەلەلەرىنە شۇعىل جاۋاپ بەرۋ جولدارىن قاراستىرىپ، جاستاردى قولداۋعا باعىتتالعان ءبىرقاتار ماڭىزدى جوبالاردى تالقىلادى.
وتىرىس بارىسىندا ءماجىلىس كوميتەتتەرى جانىنان قوعامدا، سونىڭ ىشىندە جاڭا مەديادا كوتەرىلىپ جاتقان وزەكتى ماسەلەلەر بويىنشا تۇراقتى جۇمىس ىستەيتىن ساراپشىلار الاڭدارىن قۇرۋ تۋرالى شەشىم قابىلداندى.
بارلىق كەزدەسۋلەر ونلاين رەجيمىندە ءوتىپ، ساراپشىلار مەن ب ا ق وكىلدەرى وسى ديالوگ الاڭدارىنىڭ تۇراقتى قاتىسۋشىلارىنا اينالۋى كەرەك. فراكسيا وتىرىسىندا ۆيتسە-سپيكەر، فراكسيا باسشىسىنىڭ ورىنباسارى پ. كازانتسيەۆ، دەپۋتاتتار س. نۇربەك، ە. جاڭبىرشين، ە. سمىشليايەۆا، يۋ. كۋچينسكايا، ە. بيسەمبايەۆ، ە. سايىروۆ ءسوز سويلەدى.
بايانداماشىلار پارتيا باسشىلىعى جۇكتەگەن مىندەتتەرگە سايكەس فراكسيا دەپۋتاتتارىنىڭ جۇمىسىن جانداندىرۋ جايلى وي-پىكىرلەرىمەن ءبولىستى.
