امال - الاشقا ورتاق مەرەكە
اقتاۋ. KAZINFORM - ماڭعىستاۋدا امال مەرەكەسى باستالدى. بۇگىننەن باستاپ ءوڭىر تۇرعىندارى ءۇي-ءۇيدى ارالاپ، قازاقتىڭ ءداستۇرى بويىنشا ءبىر-ءبىرىن قۇتتىقتاپ، كورىسەدى.
وسىعان وراي جىلداعى ءداستۇر بويىنشا وتپان تاۋدا «امال - الاشقا ورتاق مەرەكە» مەرەكەلىك ءىس-شاراسى باستاۋ الىپ، ەكىنشى كۇن قاتارىنان كەڭ كولەمدە تويلانىپ جاتىر.
ماڭعىستاۋداعى قارا تاۋدىڭ ەڭ بيىك شوقىسىنىڭ ەتەگىندە ەلۋگە جۋىق كيىز ءۇي تىگىلىپ، مادەني-سپورتتىق شارالار ۇيىمداستىرىلسا، جەرگىلىكتى ونەرپازداردىڭ قاتىسۋىمەن كونتسەرت باستالدى. كەشە جاعىلعان بىرلىك وتىنان كەيىن قازىر مۇندا اعىلعان جۇرتتىڭ قاراسىن كوپ. سولاردىڭ اراسىندا اقتوبە وبلىسىنان امال مەرەكەسىنە ارناي كەلگەن ساعىندىق جەتىعارين دا ءوزىنىڭ العان اسەرىمەن ءبولىستى.
«ەلىمىزدىڭ كوپشىلىك ناۋرىز مەرەكەسىن تويلاسا، ەلىمىزدىڭ باتىس وڭىرلەرىندە امال مەرەكەسى 14-ناۋرىزدان باستاۋ الادى. اسىرەسە، بۇل كۇندى ماڭعىستاۋدا ەرەكشە تويلايتىنى كوپشىلىككە بەلگىلى. جىل باستاۋى سانالاتىن بۇل كۇن - ۇلتتىق مەرەكەگە اينالۋى كەرەك. ەلىمىز امان بولىپ، وسىنداي قۋانىشتى كۇندەردى اتاپ ءوتۋدىڭ ءوزى ءبىر ۇلكەن باقىت. بارشاڭىزدى مەرەكەمەن قۇتتىقتايمىن، - دەدى اقتوبەلىك ساعىندىق جەتىعارين.
كەشە وتپان تاۋدا رەسپۋبليكالىق «امال - الاشقا ورتاق مەرەكە» ءىس-شاراسىنا تۇركيا، وزبەكستاننان دا ارنايى مەيماندار كەلىپ قاتىستى. تۇركيا رەسپۋبليكاسى «قىرعىز، تۇرىك، ماناس» ۋنيۆەرسيتەتىنىڭ وقىتۋشىسى، پروفەسسور يرفان گوردال امال تۋرالى ويىمەن ءبولىستى.
«تۇركى حالىقتارىندا ناۋرىزدىڭ ورنى ەرەكشە. ماڭعىستاۋعا العاش رەت كەلىپ وتىرمىن. امال مەرەكەسىنە شاقىرعانىنا كوپ راحمەت. ءبىزدىڭ تۇركيادا ەجەلدەن بەرى ناۋرىز مەرەكەلەدى. سوڭعى 15-20 جىلدا تاعى ءبىر بيىك دەڭگەيگە كوتەرىلدى. امالعا وسىنشالىقتى ءمان بەرىپ، ناۋرىز الدىنداعى دايىندىق دەپ وي ءتۇيدىم»، - دەدى يرفان گوردال.
وزبەكستان رەسپۋبليكاسىنىڭ ەڭبەك سىڭىرگەن مادەنيەت سالاسىنىڭ قىزمەتكەرى، جىرشى، ونەر سالاسىنىڭ ماگيسترى ماحامماد ەشبويەۆ امالدىڭ ماڭىزىن اتادى.
«اتا-بابامىزدىڭ ءتۇبى ءبىر. تويلارىمىز بەن وزگە دە قۋانىشتى اتاپ ءوتۋ ءداستۇرىمىز ۇقساس. قازاقستاندا ءانشى-جىرشىسىز توي وتپەيدى. سول ورايدا ناۋرىزدى وزبەك پەن قازاق قاتار تويلايدى. ال امال مەرەكەسىنىڭ بىرەر اپتا بۇرىن ەرتە باستالىپ، تويلانۋى ءبىزدى ەرەكشە قىزىقتىرادى. قازاق حالقىنىڭ وزىندىك ءداستۇرىن، بولمىسىن، توي تويلاۋ ءۇردىسىن كورىپ، ەلگە بارعاندا ايتىپ جۇرەمىن»، - دەدى ماحامماد ەشبويەۆ.
كەشە وتپان تاۋدا مەرەكەگە وراي كەشكىلىك بىرلىك وتى جاعىلعان بولاتىن. اتالعان راسىمگە ءوڭىر تۇرعىندارىمەن بىرگە وبلىس اكىمى باستاپ، وزگە وڭىرلەردەن كەلگەن ءبىرقاتار قۇرمەتتى قوناقتار ارنايى قاتىستى.
اۆتور
جانكەلدى قارجان
