الىس ساپارعا شىعار الدىندا كولىكتى قالاي دايىنداۋ كەرەك: بەس ماڭىزدى كەڭەس

استانا. قازاقپارات - جاز مەزگىلى - جۇرتتىڭ ناعىز دەمالاتىن ۋاقىتى. كوپ ادام ساياحاتقا ءوز كولىگىمەن شىققاندى ءجون كورەدى. الايدا ساپار ءساتتى جانە قاۋىپسىز ءوتۋى ءۇشىن تەك قوناقۇيگە تاپسىرىس بەرىپ، مارشرۋت جوسپارلاۋ جەتكىلىكسىز، اۆتوكولىكتىڭ جاعدايىن دا الدىن الا تەكسەرۋ اسا ماڭىزدى.

قازىرگى زامانعى كولىكتەر سەنىمدى ءارى ۇزاق جولعا دايىن، ءبىراق ول ءۇشىن تۇراقتى تەحنيكالىق قىزمەت كورسەتۋ جاسالىپ وتىرۋى كەرەك. تەحنيكالىق قىزمەتتەن جاقىن ارادا وتكەن بولسا دا، ۇزاق ساپار الدىندا قوسىمشا تەكسەرۋ ارتىق بولمايدى.

وسى ورايدا ءبىز جولعا شىعار الدىندا مىندەتتى تۇردە نازار اۋدارۋ قاجەت 5 نەگىزگى تەكسەرۋدى ۇسىنامىز.

1. قوزعالتقىش جانە نەگىزگى جۇيەلەر

اۆتوكولىكتىڭ باستى ەلەمەنتى - قوزعالتقىش. ونى جولعا شىعار الدىندا مۇقيات قاراۋ كەرەك:

ماي دەڭگەيى مەن ساپاسى: موتور مايىنىڭ دەڭگەيىن تەكسەرىڭىز. ەگەر ماي تىم قارايىپ كەتسە نەمەسە اۋىستىرۋ ۋاقىتى كەلسە - جاڭاسىنا اۋىستىرىڭىز.

انتيفريز: سالقىنداتقىش سۇيىقتىقتىڭ دەڭگەيى مەن جاعدايىن باقىلاڭىز. قاجەت بولسا، ىلعال دەڭگەيىن دە تەكسەرتىپ الىڭىز.

سۇزگىلەردى اۋىستىرۋ: اۋا سۇزگىسى مەن سالون سۇزگىسىن اۋىستىرۋ - قوزعالتقىش جۇمىسىنا جەڭىلدىك بەرەدى جانە سالون ىشىندەگى اۋانى تازارتادى.

كونديتسيونەر: ونىڭ دۇرىس جۇمىس ىستەيتىنىنە جانە كولەمى جەتكىلىكتى ەكەنىنە كوز جەتكىزىڭىز. ىستىقتا كونديتسيونەر - جايلىلىق پەن قاۋىپسىزدىك كەپىلى.

اككۋمۋلياتور: باتارەيانىڭ جاعدايىن تەكسەرىڭىز. ناشار نەمەسە ەسكى اككۋمۋلياتور دەمالىسىڭىزدىڭ ءسانىن بۇزۋى مۇمكىن.

شىعىن ماتەريالدارى: ەگەر تەحنيكالىق قىزمەت كورسەتۋ ورتالىعىنىڭ قىزمەتكەرلەرى وتالدىرۋ شامدارىن، بەلدىكتى اۋىستىرۋدى ۇسىنسا - نازاردان تىس قالدىرماڭىز. بۇل جول ۇستىندە ۇلكەن قيىندىقتىڭ الدىن الادى.

2. تەجەۋ جۇيەسى

جولداعى قاۋىپسىزدىك تەجەۋ جۇيەسىنە تىكەلەي بايلانىستى. مىندەتتى تۇردە تەكسەرىڭىز:

تەجەۋ سۇيىقتىعىنىڭ دەڭگەيى مەن ساپاسى.

تەجەگىش كولودكالار مەن ديسكىلەردىڭ جاعدايى.

تەجەۋ قۇبىرلارى مەن شلانگىلەردىڭ بۇتىندىگى.

كەمشىلىكتەر انىقتالسا - دەرەۋ جوندەۋ نەمەسە اۋىستىرۋ قاجەت. تەجەگىشپەن بايلانىستى اقاۋلاردى كەيىنگە قالدىرۋعا بولمايدى.

3. دوڭگەلەكتەر مەن شينالار

ماۋسىمعا ساي شينا: جازدا - تىكەنەكتى شينا قولدانۋعا بولمايدى، ال قىستا - جازعى شينامەن جۇرۋگە تىيىم سالىنادى.

پروتەكتور تەرەڭدىگى - كەمىندە 1,6 م م بولۋى ءتيىس.

دوڭگەلەكتىڭ جىرتىلعانى نەمەسە ءىسىپ تۇرعان جەرى بولماۋى كەرەك.

دوڭگەلەك قىسىمى - ءوندىرۋشى ۇسىنعان كورسەتكىشكە سايكەس بولۋى كەرەك (كولىك ەسىگى جاقتاۋىنىڭ ىشىندە جازىلادى).

بالانس پەن جۇپتىلىق - دوڭگەلەك دىرىلدەسە، تەكسەرۋ قاجەت.

قوسالقى دوڭگەلەك پەن جوندەۋ جيىنتىعى - ساپاردا شينا جارىلىپ قالعان جاعدايدا وتە كەرەك.

كولىگىڭىزدە ءارقاشان دومكرات، باللون كىلتى جانە قۇرال-سايماندار جيناعى بولۋى كەرەك.

4. جارىق جانە كورىنىس

فارالار مەن شامدار تولىق جۇمىس ىستەۋى ءتيىس: جاقىن جانە الىس جارىق، بۇرىلىس كورسەتكىشتەرى، اپاتتىق دابىل جۇيەسى، تەجەگىش شامدارى.

جارىق شامدارىن دۇرىس رەتتەۋ قاجەت - جولدى جارىقتاندىرىپ، قارسى كەلە جاتقان جۇرگىزۋشىگە كەدەرگى كەلتىرمەۋى ءتيىس.

اينەك تازارتقىشتار: شەتكالاردى جاڭاسىنا اۋىستىرعان ءجون، ال اينەك جۋۋ سۇيىقتىعىن قوسىمشا كانيسترمەن الىپ ءجۇرۋ ۇسىنىلادى.

قوسىمشا سۇيىقتىق: ماي، ديستيلدەنگەن سۋ، انتيفريز، مۇنىڭ ءبارى كولىگىڭىزدە ارتىعىمەن ءجۇرسىن.

5. اۆتوكولىكتە بولۋى ءتيىس زاتتار

جولدا قاجەت بولۋى مۇمكىن قۇرالدار:

دومكرات جانە قۇرالدار جيىنتىعى.

سۇيرەۋ ارقانى.

اپاتتىق توقتاۋ بەلگىسى.

ءورت سوندىرگىش (جارامدىلىق مەرزىمى وتپەگەن).

جىلتىر شاعىلىستىرعىش جيلەت.

مەديتسينالىق قوبديشا (تولىق، جارامدى).

قوسىمشا قاۋىپسىزدىك پەن جايلىلىق ءۇشىن:

ىشۋگە ارنالعان سۋ.

جىلى كيىم نەمەسە قوسالقى كيىم.

جامىلعى/كورپە.

تەلەفونعا/گادجەتكە قۋاتتاۋ قۇرىلعىلارى مەن سىمدار.

قوبديشا مەن ءورت سوندىرگىشتى قولجەتىمدى جەرگە قويىڭىز - مىسالى، جۇرگىزۋشى ورىندىعىنىڭ استىنا. جيلەت ەسىك قالتاسىندا تۇرۋى ءتيىس، اسىرەسە جول شەتىنە توقتاعاندا كيۋ مىندەتتى.

el.kz