اليمەنت تولەۋدەن جالتارعاندارعا قانداي جازا قاراستىرىلعان - پروكۋراتۋرا جاۋابى
استانا. KAZINFORM - قازاقستاندا ونداعان مىڭ بالا اليمەنتكە تاۋەلدى. الايدا، بارلىق اتا-انا ءوز مىندەتىن ورىنداي بەرمەيدى، دەپ حابارلايدى استانا اكىمدىگىنىڭ رەسمي سايتى.
كەيبىرى بۇل جايىندا ۇمىتىپ كەتسە، ەندى ءبىرى سوت شەشىمىن ادەيى ەلەمەيدى. دەگەنمەن، زاڭ مۇنداي قۇقىقبۇزۋشىلاردى جازاسىز قالدىرمايدى. اليمەنت تولەۋدەن جالتارعاندارعا قانداي جازا قولدانىلاتىنى تۋرالى ەلورداداعى نۇرا اۋدانىنىڭ پروكۋراتۋراسى ءتۇسىندىرىپ بەردى.
«نەكە (ەرلى-زايىپتى) جانە وتباسى تۋرالى» كودەكستىڭ 171-بابىنا سايكەس، اليمەنتتى كەشىكتىرگەن ءار كۇنى ءۇشىن قارىز سوماسىنىڭ %0,1 مولشەرىندە ءوسىمپۇل ەسەپتەلەدى.
وسىمەن ءبارى بىتكەن جوق. تولەمنەن جالتارعاندارعا اكىمشىلىك قۇقىقبۇزۋشىلىق تۋرالى كودەكستىڭ 669-بابىنا سايكەس اكىمشىلىك جازا قولدانىلادى:
• 5 ا ە ك- كە دەيىن ايىپپۇل؛
• 5 تاۋلىككە دەيىن اكىمشىلىك قاماققا الۋ.
ەگەر بورىشكەر بىرنەشە اي بويى اليمەنت تولەمەي، سوت ورىنداۋشىلارىنىڭ ەسكەرتۋىنە قۇلاق اسپاسا، ول قىلمىستىق جاۋاپكەرشىلىككە تارتىلۋى مۇمكىن. ق ر قىلمىستىق كودەكسىنىڭ 139-بابىندا مىناداي جازا تۇرلەرى كوزدەلگەن:
• 600 ساعاتقا دەيىن قوعامدىق جۇمىس؛
• 2 جىلعا دەيىن باس بوستاندىعىنان ايىرۋ.
مىسالى، نۇرا اۋدانىنىڭ پروكۋراتۋراسى اليمەنت قارىزى بار بولا تۇرا، كازينو مەن بۋكمەكەرلىك كەڭسەلەردەن ۇتىس العان، الايدا ءۇش ايدان استام ۋاقىت بويى ادەيى تولەم جاساۋدان جالتارعان بورىشكەرلەردى انىقتادى.
اتقارىلعان جۇمىس ناتيجەسىندە 11 بورىشكەر قىلمىستىق جاۋاپكەرشىلىككە تارتىلدى.
باسقاشا ايتقاندا، بالا الدىنداعى بورىش قاماۋعا الۋمەن اياقتالۋى مۇمكىن. ءبىراق ءتىپتى سوتقا جەتكىزبەي-اق قولدانىلاتىن شەكتەۋ شارالارى بار.
سوت ورىنداۋشىلارى مىنالاردى جاساۋعا قۇقىلى:
• شەتەلگە شىعۋعا تىيىم سالۋ؛
• ۋاقىتشا جۇرگىزۋشى كۋالىگىنەن ايىرۋ؛
• مۇلىك پەن شوتتارعا تىيىم سالۋ.
بۇل - مۇمكىن بولاتىن شەكتەۋلەردىڭ ءبىر بولىگى عانا.
ەگەر قارجىلىق قيىندىقتار تۋىنداسا - جاسىرىنىپ قالۋدىڭ قاجەتى جوق. بورىشكەرگە ەڭبەكپەن قامتۋ ورگاندارىنا جۇگىنۋ نەمەسە تولەمدى ءبولىپ تولەۋ تۋرالى كەلىسىم جاساعانى ءجون.
نۇرا اۋدانىنىڭ پروكۋراتۋراسى كامەلەتكە تولماعان بالالاردى اسىراۋ مىندەتى اتا-انالارعا جۇكتەلەتىنىن ەسكە سالادى.
ايتا كەتەيىك، ب ق و- دا اليمەنت بەرەشەگى 375 مىڭ تەڭگەدەن اسقان ەر ادام قاماۋعا الىندى.
