الي اليەۆ فۋتبولدان قازاقستان قۇراماسى باس باپكەرى قىزمەتىنەن كەتەتىنىن مالىمدەدى

استانا. KAZINFORM - فۋتبولدان قازاقستان قۇراماسىنىڭ باس باپكەرى الي اليەۆ ءوز ەركىمەن قىزمەتىنەن كەتەتىنىن ءمالىم ەتتى.

قازاقستاندىق مامان مۇنداي شەشىمگە ۇلتتىق قۇرامانىڭ 2026 -جىلعى الەم چەمپيوناتىنىڭ ىرىكتەۋ كەزەڭىندە بەلگيادان ءىرى ەسەپپەن (0:6) جەڭىلگەننەن كەيىن كەلگەن.

- قىسقا عانا ايتقىم كەلەدى: جەڭىلىستى ءوز موينىما الامىن، بۇل - مەنىڭ كىنام. فۋتبولشىلاردىڭ ەش قاتىسى جوق. ەلگە ورالعان سوڭ بىردەن جۇمىستان كەتۋ جونىندە ارىز جازامىن، - دەدى ول ويىننان كەيىنگى باسپا ءسوز ءماسليحاتىندا.

الي اليەۆ 1980-جىلى 27 -قازاندا الماتى قالاسىندا دۇنيەگە كەلگەن.

فۋتبولشى مانسابىندا «سسكا- قايرات»، «قايرات»، «ەرتىس»، «توبىل»، «شىعىس»، «ورداباسى» جانە « قىزىلجار» كلۋبتارىندا وينادى. سونداي-اق تۇركيانىڭ «اكچاابات سەباتسپور»، «كايسەري ەردجيەسپور»، «كارتالسپور» جانە «ديارباكىرسپور» كوماندالارىندا ونەر كورسەتكەن.

باپكەرلىك مانسابىن 2014 -جىلى «ورداباسى» ساپىندا ويىنشى ءارى باپكەر رەتىندە باستادى. 2018 -جىلى فۋتبولشى مانسابىن اياقتاعان سوڭ پەتروپاۆلدىڭ « قىزىلجار» كلۋبىنىڭ تىزگىنىن ۇستاپ، پرەمەر- ليگاعا شىعاردى.

2021-جىلى اليەۆ قاراعاندىنىڭ «شاحتەر» كلۋبىندا باس باپكەر بولىپ جۇمىس ىستەپ، كەيىن «استانا» ف ك جاستار كومانداسىن باسقاردى.

2022 -جىلى «جەڭىس» كومانداسىن جاتتىقتىرىپ، سودان كەيىن قايتادان « قىزىلجارعا» ورالدى. ءالي اليەۆتىڭ جەتەكشىلىگىمەن پەتروپاۆلدىق كلۋب ۋەفا كونفەرەنتسيا ليگاسى ىرىكتەۋ كەزەڭىنىڭ ءۇشىنشى اينالىمىنا دەيىن جەتتى.

ونىڭ باسشىلىعىمەن قازاقستان ۇلتتىق قۇراماسى بيىل قاڭتار ايىنان باستاپ 7 كەزدەسۋدە ەكى مارتە جەڭىپ، قالعانىندا قارسىلاستارىنا ەسە جىبەردى.

قازىرگە دەيىن قازاقستاندىق فۋتبولشىلار بەلگيادان وزگە ۋەلس (1:3، 0:1) پەن سولتۇستىك ماكەدونيا (0:1) قۇرامالارىنان جەڭىلىپ، ليحتەنشتەيننەن (2:0) باسىم ءتۇستى.