پاۆلودارلىق ستۋدەنتتەر KAZ Minerals توبىنىڭ گرانتىنا يە بولدى
پاۆلودار. قازاقپارات - 2024 -جىلى KAZ Minerals توبى پاۆلودار ءوڭىرىنىڭ تالاپكەرلەرى ءۇشىن 20 گرانت ءبولدى. تەگىن ورىننىڭ التاۋى حيميا- مەحانيكالىق كوللەدج ستۋدەنتتەرىنە بەرىلسە ، قالعان 14 ى جوعارى وقۋ ورىندارىنا ارنالعان بولاتىن. Kazinform ءتىلشىسى گرانت يەلەرىمەن اڭگىمەلەسىپ، تاۋ- كەن ءوندىرۋشى كومپانيانىڭ ەسەبىنەن ءبىلىم الۋ تالاپتارىمەن تانىستى.
ليليا ۆەشۋنوۆا - KAZ Minerals بولگەن گرانت يەلەرىنىڭ ءبىرى. بويجەتكەن بۇرىننان ءوزىنىڭ 9-سىنىپتان كەيىن تەحنيكالىق ءبىلىم الۋ ءۇشىن كوللەدجگە وقۋعا تۇسەتىنىن بىلەتىن.
«اتا-انامنىڭ كەڭەسىنەن كەيىن كومپانيانىڭ گرانتىنا قۇجات تاپسىرۋ مەن ءۇشىن ماقسات بولدى. ءبىزدىڭ وتباسى تاۋ-كەن ءىسىن جاقسى بىلەدى. وگەي اكەم بوزشاكول كەن ورنىندا جۇمىس ىستەگەن، ال انام مەتاللۋرگيا كوللەدجىندە وقىعان»، - دەيدى پاۆلودار حيميا- مەحانيكالىق كوللەدجىنىڭ ءبىرىنشى كۋرس ستۋدەنتى ليليا ۆەشۋنوۆا.
ليليادان باسقا تاعى ءتورت ستۋدەنت قىز قاجەتتى بالل جيناپ، KAZ Minerals وكىلدەرىمەن سۇحباتتان ءساتتى وتكەننەن كەيىن پاۆلودارلىق كوللەدجدە «لابورانت» ماماندىعى بويىنشا وقۋلارىن باستاپ كەتتى.
«كونكۋرس وتىنىشتەردى قاراستىرۋ جانە ۇمىتكەرلەرمەن سۇحباتتاسۋ سەكىلدى ەكى كەزەڭنەن تۇردى. بۇل جۇمىستاردى قۇرىلىمدىق بولىمدەردىڭ باسشىلارى مەن ماماندارى، قىزمەتكەرلەردى وقىتۋ جانە دامىتۋ ءبولىمىنىڭ باسشىسىنان تۇراتىن كوميسسيا اتقاردى. سۇحباتتىڭ قورىتىندىسىنان كەيىن گرانت يەلەرى انىقتالدى»، - دەپ مالىمدەدى KAZ Minerals Bozshakol قىزمەتكەرلەردى وقىتۋ جانە دامىتۋ ءبولىمىنىڭ باسشىسى نازىم مۇقاشيەۆا.
ستۋدەنتتەر ديپلوم العاننان كەيىن قايدا بارىپ جۇمىس ىستەيتىنىن بىلەدى. پاۆلودار وبلىسى بوزشاكول تاۋ-كەن بايىتۋ كەشەنىندەگى زەرتحانادا ءۇش جىل جۇمىس ىستەۋ - گرانت ءبولۋ كەزىندەگى مىندەتتى تالاپتاردىڭ ءبىرى.
«KAZ Minerals ەسەبىنەن تەگىن ءبىلىم الۋ مۇمكىندىگىن الدىمەن اتا-انام ءبىلدى. كومپانيا وقۋ اياقتالعاننان كەيىن جاقسى جۇمىس، ىڭعايلى كەستە مەن جوعارى جالاقى ۇسىنادى. قازىر ماتەماتيكا مەن فيزيكادان قينالىپ ءجۇرمىن. ءبىراق ماعان وقۋ ۇنايدى»، - دەيدى ستۋدەنت سامال تەمىروۆا.
كومپانيا ستۋدەنتتەردىڭ ستيپەندياسىن تولەيدى. سونىمەن قاتار كوللەدجدەگى وقۋ بولمەلەرى مۇعالىمدەر ماقۇلداعان جابدىقتارمەن جاساقتالىپ جاتىر.
«قۇرال-جابدىقتاردىڭ قانداي تەحنيكالىق تالاپتارعا ساي بولۋى ەسكەرتىلگەن. بارلىعىن قوسقاندا كوللەدجگە جالپى قۇنى 50 ميلليون تەڭگە بولاتىن قۇرىلعىلار كەلۋگە ءتيىس. ءبىز ناقتى KAZ Minerals كومپانياسىنا قاجەت مامانداردى دايىنداپ جاتىرمىز. ابيتۋريەنتتەر مەن ولاردىڭ اتا- انالارىنا ارنالعان اقپاراتتاندىرۋ جۇمىستارىن جۇرگىزەمىز»، - دەيدى پاۆلودار حيميا-مەحانيكالىق كوللەدجىنىڭ تاجىريبە جەتەكشىسى جانە ارنايى ءپان وقىتۋشىسى تاتيانا گاۆريليۋك.
اۆتور
ەلميرا ورالبايەۆا
