پاۆلودارلىق قىز بەت-الپەتىن بۇلدىرگەن كوسمەتولوگتان 400 مىڭ تەڭگە ءوندىرىپ الدى
پاۆلودار. KAZINFORM - وبلىس ورتالىعىنىڭ تۇرعىنى بەت-الپەتىن اسەمدەۋ ماقساتىمەن كوسمەتولوگقا بارعان. الايدا ەگىلگەن پرەپاراتتان اۋزى ءىسىپ، بەتىن بۇلدىرگەن.
كاسىبي ەمەس مامانعا جولىققانىن تۇسىنگەن ول كوسمەتولوگتى سوتقا بەرىپ، 400 مىڭ تەڭگە وتەماقى ءوندىرىپ الدى.
پاۆلودارلىق قىز Instagram-داعى جارنامانى كورىپ، ەرنىن ۇلكەيتپەك ويمەن كوسمەتولوگتىڭ قابىلداۋىنا جازىلعان. پروتسەدۋرا بارىسىندا ەگىلگەن پرەپاراتتىڭ اسەرىنەن قىزدىڭ دەنەسى قىشىپ، دۋىلداي جونەلگەن. ول از بولعانداي، ەرنىنىڭ اينالاسى ءىسىپ، تۇيىندەر پايدا بولعان. اقىر- سوڭى قىز الگىنىڭ وپا تاپتىرمايتىنىن سەزدى مە، قىزمەتىن اياقتاتپاستان وزگە كوسمەتولوگقا تايىپ تۇرعان. ول جەردە بارلىعىن دۇرىس جۇرگىزگەن مامان ەگىلگەن پرەپاراتتى سىرتقا شىعارىپ، ەرنىن تۇزەتىپ بەرگەن.
«ساپاسىز قىزمەت كورسەتكەن كوسمەتولوگ كليەنتكە اقىسىنىڭ تەڭ جارتىسىن، ياعني 12,5 مىڭ تەڭگەسىن عانا قايتارىپ بەرگەن. بۇعان كەلىسپەگەن قىز ءبىزدىڭ دەپارتامەنتكە حابارلاستى. وعان سوتقا شاعىم تۇسىرۋگە كەڭەس بەردىك. ناتيجەسىندە سوت شەشىمىمەن قىزمەت كورسەتۋشى شاعىمدانۋشىعا 400 مىڭ تەڭگە وتەماقى تولەيتىن بولدى»، - دەپ حابارلادى وڭىرلىك ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتىنەن.
بۇعان قوسا سوت بارىسىندا كوسمەتولوگتىڭ ەشقانداي بىلىكتىلىگى بولماعانى انىقتالعان. وقيعا كەزىندە ول ارنايى كۋرستا ءبىلىم الىپ جۇرگەن.
اۆتور
مۇرات اياعان
