پاۆلوداردا قولقانى اتاتىن جاعىمسىز ءيىس قايدان شىقتى
پاۆلودار. KAZINFORM - سوڭعى كۇندەرى پاۆلودارلىقتار قالا اۋماعىن مۇڭكىگەن جاعىمسىز ءيىس جاۋلاپ العانىنا جاپپاي شاعىمدانۋدا. كەشكىلىك شاھار ىشىندە مۇناي ونىمدەرىنىڭ يىسىنە كەلەتىن، قولقانى اتاتىن ساسىق ءيىس جايلاپ، تۇرعىندار پاتەرلەرىنىڭ تەرەزەلەرىن اشۋدان قالدى. بۇدان كەيبىر ادامداردىڭ باستارى اۋىرىپ، سوزىلمالى اۋرۋلارى مازالاپ جاتقانىن ايتادى.

بۇل تۇرعىدا كوپشىلىكتىڭ پىكىرى ەكىگە جارىلىپ تۇر. ءبىرى مۇڭكىگەن ءيىس قالانىڭ ونەركاسىپ اۋدانى اۋماعىنان كەلەدى دەسە، ەندى ءبىرى كوشەلەرگە توسەلىپ جاتقان جاڭا اسفالتتان شىعىپ جاتىر دەگەن پىكىردە. جالپى ءيىس مۇناي ونىمدەرىنىڭ يىسىنە كەلەتىنىن ايتادى تۇرعىندار.
جۇرتشىلىقتىڭ شاعىمىنا وراي پاۆلودار قالاسى ءماسليحاتىنىڭ دەپۋتاتتارى وڭىرلىك ەكولوگيا دەپارتامەنتىنە جازباشا حات ءتۇسىردى. وندا تۇرعىنداردىڭ جەرگىلىكتى ءىرى كاسىپورىنداردىڭ اتموسفەراعا قاۋىپتى قالدىقتاردى شىعارۋى بويىنشا كۇدىگى بار دەلىنگەن. دەپۋتاتتار سوعان وراي پاۆلودار قالاسىنداعى اۋاعا مونيتورينگ جۇرگىزۋدى سۇرادى.
ال ەكولوگيا دەپارتامەنتى ءوز كەزەگىندە بۇگىن كۇندىز «قازگيدرومەت» مەكەمەسىنىڭ فيليالى مونيتورينگتى باستاپ كەتكەنىن مالىمدەدى.
- «قازگيدرومەت» فيليالى اۋا ساپاسىن كۇندەلىكتى تەكسەرۋدى 7 ستاتسيونارلىق مەتەوپوستتا جۇزەگە اسىرادى. وندا اتموسفەرالىق اۋانىڭ ساپاسىن ولشەۋ ناقتى ۋاقىت رەجيمىندە ۇزدىكسىز جۇزەگە اسىرىلىپ كەلەدى. قالا تۇرعىندارىنىڭ مۇناي ونىمدەرىنىڭ يىسىنە قاتىستى كوپتەگەن شاعىمدارىنا بايلانىستى اتموسفەرالىق اۋا پارامەترلەرىن ولشەۋ ءۇشىن ەكولوگيا دەپارتامەنتى، جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى، «قازگيدرومەت» فيليالى ماماندارىنىڭ بىرلەسكەن ساپارى ۇيىمداستىرىلدى. ولشەۋلەر مۇناي وڭدەۋ ونىمدەرىنىڭ شىعارىندىلارىمەن سيپاتتالاتىن كاسىپورىنداردىڭ سانيتارلىق-قورعاۋ ايماعىنىڭ شەكاراسىندا جۇرگىزىلدى («كومپانيا نەفتەحيم LTD» ج ش س، «پ م ح ز» ج ش س، اسفالتبەتون زاۋىتتارى (ا ب ز). دەرەكتەردىڭ دۇرىستىعى ءۇشىن مونيتورينگ تۇنگى ۋاقىتتا جالعاساتىن بولادى. تالداۋ جۇرگىزىپ، اتموسفەرالىق اۋانى سىناۋ ناتيجەسىن العاننان كەيىن ناقتى اقپاراتتى قوسىمشا حابارلايمىز»، دەپ مالىمدەدى دەپارتامەنتتەن.
ەسكە سالا كەتەيىك، بۇعان دەيىن اقتاۋدى جاعىمسىز ءيىس جايلاعانى تۋرالى جازعان ەدىك.