پاۆلوداردا جوعالىپ كەتكەن ايەل 13 كۇننەن سوڭ تابىلدى
پاۆلودار. KAZINFORM – پاۆلودارلىق 26 جاستاعى ايەل اكەسىمەن كەلىسپەي قالىپ، ۇيىنەن شىعىپ كەتكەن. جوعالعان انا ارادا 13 كۇن وتكەندە پاۆلودار قالاسىنان تابىلدى.
پاۆلودار وبلىسى ەرتىس اۋدانىندا تۇراتىن انانىڭ جوعالعانى تۋرالى قۇقىق قورعاۋ ورگاندارىنا اكەسى حابارلاعان.
اكەسىنىڭ سوزىنشە، قىزى 8- قاڭتار كۇنى پاۆلودار قالاسىنا كەتىپ، سودان ورالماعان. ۇيدە ونىڭ ەكى كىشكەنتاي بالاسى قالعان.
- پوليتسيا قىزمەتكەرلەرى مەن ۆولونتەر جاستار كوپ جينالاتىن جەرلەردى تەكسەرىپ، قوعامدىق ورىنداردىڭ بارلىعىن ءسۇزىپ شىقتى. بارلىق اۋماقتىق پوليتسيا بولىمدەرىنە، سونداي-اق شەكارا ماڭىنداعى ايماقتارعا باعدار جىبەرىلدى. قابىلدانعان شارالاردىڭ ناتيجەسىندە ارادا 13 كۇن وتكەندە جوعالعان ادام قالالىق پاتەرلەردىڭ بىرىندە بولعانى انىقتالدى.
جاس انانىڭ ايتۋىنشا، اكەسىمەن كەلىسپەي قالعانىنا بايلانىستى ۇيدەن كەتىپ قالعان. تۇرىپ جاتقان جەرىن جاسىرىپ، ايتپاعان، - دەدى پاۆلودار وبلىسى پوليتسيا دەپارتامەنتىنىڭ كريمينالدىق پوليتسيا باستىعى بالعاباي قاپاروۆ.
پوليتسەيلەر اڭگىمە بارىسىندا ايەل ادامنىڭ ءوزىن ءبىرتۇرلى ۇستاعانىنان كۇدىكتەنىپ، مەديتسينالىق كۋالاندىرۋدان وتكىزگەن.
ناتيجەسىندە قانىنان وپيويدتى مەتابوليدتەر تۇرىنە جاتاتىن «تروپيكاميد» تابىلدى.
ەرتىس اۋدانىنىڭ پوليتسيا قىزمەتكەرلەرى اكىمدىك جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسياعا جاس انانىڭ ءتارتىبى قارالاتىن ماتەريال دايىنداۋدا.
